2023ko abenduaren 31 baino lehen Sodupeko Herriko Plazak hogei plazako bizikleta-aparkaleku seguru bat eukiko du. Horrela aurkeztu dute Garraioak eta Mugikortasun Jasangarria Sustatzeko diputatuak, Miguel Ángel Gómez Viar-ek, eta Gueñesko alkateak, Juan Andrés Iragorrik.
Gueñesko BiziPark berria Sodupeko Herriko Plazan dagoen aparkalekuaren oinezkoentzako sarbidearen ondoan kokatuko da, Bizkaibusen zenbait geltokitatik hurbil. Bi erakundeen artean lortutako akordioaren arabera, Garraioak eta Mugikortasun Jasangarria Sustatzeko Sailak 60.000 euroko dirulaguntza emango du instalazio osoa jartzeko, eta Udalak aparkalekua egokitu eta hornitzeko lanak egingo ditu, baita berau kudeatu eta mantentzeaz arduratu ere kontratua indarrean den lau urteetan.
Bizikletak aparkatzeko hogei plaza izango ditu gutxienez, honako baliabide hauekin: sarrera-kontrola eta kudeatzeko softwarea, Interneteko konexioarekin; barrualdea beti argiturik egoteko sistemak; gutxienez suaren aurkako sei armairu, bakoitza bere elektrizitate-hargunearekin, erabiltzaileek beren gauzak seguru edukitzeko; zaintza-sistemak, eta Gueñesko Udaltzaingoaren segurtasun-zerbitzuekin konektatutako kamerak.
Horrez gain, Bizkaiko Foru Aldundiak Bizkaiko BiziPark guztietarako emandako jarraibideen arabera pertsonalizatuko da espazioa.
Hamasei urtetik gorako pertsona orok, Gueñesen bizi zein ez, plaza horiek erabiltzeko eskaera egin ahal izango du. Eskaera-kopurua plaza-kopurua baino handiagoa bada, zozketa egingo da.
Hasiera batean aurreikusitakoaren arabera, aparkalekuak eguneko 24 orduetan funtzionatuko du, urteko 365 egunetan, eta hauexek izango dira aparkalekua erabiltzeko tarifak: 4 € hilabetea; 10 € hiruhilekoa; 20 € seihilekoa eta 40 euro urte osoa. Hamalau egunik behin erabili beharko da bizikleta, aparkalekua ez dadin bizikletak gordetzeko toki batean bilakatu.
Aparkalekua 2023ko abenduaren 31 baino lehen martxan jartzeko konpromisoa hartu da.
