Aburtok parte hartuko du Atlantic Cities Sarearen Batzar Nagusian

Astearte eta asteazken honetan, ekainaren 2an eta 3an, Azkuna Zentroak Atlantic Cities Sarearen Batzar Nagusia jasoko du. Bertan hartuko du parte Bilboko alkate Juan Mari Aburtok, eta berarekin batera Eider Inunciaga Euskarako, Herritarren Arreta eta Partaidetzako, 2030 Agendako eta Nazioarteko Gaietako zinegotzia egongo da.

Sarea osatzen duten 4 estatuetako 17 hirietako alkate, hautetsi eta teknikariekin batera, saio instituzional honetara joango da: "Arku Atlantikoa. “Gobernantza eta Policy Lab, GRAAL proiektuarekin". Kantabriako Hidraulikako Institutuaren laguntzarekin, bihar, asteartea, ekainak 2, hausnarketa kolektiboko lehen tailer bat egingo da 09:00etan, Europako proiektuen eraginkortasuna tokiko ikuspegitik aztertzeko eta haien eragina GRAALen testuinguruan aztertutako sektoreetako batean edo bitan nola handitu zehazteko.  Hala, turismo jasangarria, natura kontserbatzea eta babestea, klima-aldaketara egokitzea eta arriskuak prebenitzea, kutsadura ozeanikoa eta itsas energia berriztagarriaren ekoizpena jorratuko dira. Bigarren tailer batean, 11:30ean, Sarearen proiektuari buruzko gogoeta egingo da. Sarearen zereginari buruzko barne-hausnarketa honetan, parte-hartzaile bakoitzak Sarearen helburuei eta misioei buruz duen ikuspegia adieraziko du, erreferentzia-esparru komun bat sortze aldera.

Ekainaren 3an (asteazkena) izango da Batzar Nagusiaren eguna. Bertan izango dira Juan Mari Aburto Bilboko alkatea eta Inés Rey Atlantic Cities-eko presidentea. Batzarrean, 2025-2026 aldiko jardueren balantzearen eta 2026-2027 aldirako jarduera-aurreikuspenen berri emango da. Eguerdiko 13:30ean, oso une berezia egongo da, 2026ko Bilboko Adierazpena irakurri eta onartzean.    

Bilboko 2026ko adierazpena irakurtzea eta onartzea

Bilbon Atlantic Cities-en Batzar Nagusiaren testuinguruan bilduta, Arku Atlantikoko hiriek Makroeskualde Atlantiko sendo, jasangarri eta solidario bat sortzeko konpromisoa berresten dute. Onartutako adierazpen bateratuak defendatzen du Arku Atlantikoa espazio estrategikoa dela Europaren etorkizunerako, hirien, eskualdeen eta eragile sozioekonomikoen artean lankidetza bultzatzeko gai dena, denek partekatzen dituzten erronkak jorratzeko, hala nola trantsizio ekologikoa, lurralde-kohesioa, berrikuntza, mugikortasun jasangarria eta garapen ekonomikoa. Era berean, hiriek makroeskualde honen motor gisa duten funtsezko eginkizuna azpimarratzen dute, eta kostaldeko eta barnealdeko lurraldeen arteko lotura indartzearen aldeko apustua egiten dute, garapen-eredu orekatuagoa, erresilienteagoa eta lehiakorragoa eraikitzeko. 

Atlantic Cities Arku Atlantikoko hirien identitatean eta interes espezifikoetan oinarritutako Europako sarea da. Gaur egun, kide hauek ditu: Biarritz, Bilbo, Braga, Brest Métropole, Cork, Coruña, Donostia, Faro, Gijón, Gipuzkoako Foru Aldundia, Lisboa, Rennes Métropole, La Rochelleko hiri-komunitatea, Las Palmas (Kanaria Handia), Santander, Santiago de Compostela eta Viana do Castelo.Hiri atlantikoen interesak Europako erakundeen aurrean ordezkatzea, Atlantikoko eta Europako eskalako lankidetza sustatzea, eta Atlantikoko hirien eta haien lurraldeen garapena eta lehiakortasuna babestea dira Sarearen helburu garrantzitsuenetako batzuk. Sareak hainbat abantaila eskaintzen dizkie bere kideei. Besteak beste, Europako lankidetza-proiektuetarako sarbidea, jardunbide egokien eta soluzio berritzaileen trukaketa, EBren politika publikoetan ordezkaritza izatea, eskala atlantikoan lankidetza sustatzea, eta Europako finantzaketaren erakarpena areagotzea.   

Juan Mari Aburto Bilboko alkatearen ekarpena Bilboren esperientzia izango da; izan ere, Bilbok, hiri atlantiko gisa, erronkak aukera bihurtzen jakin du, lankidetzaren, berrikuntzaren eta epe luzeko ikuspegi estrategikoaren bidez. Bere hitzaldian, erronkei aurre egiterakoan hiriek funtsezko eragile gisa duten zeregina nabarmenduko du, zehazki trantsizio ekologikoan, industria-eraldaketan, klima-erresilientzian edo lurralde-kohesioan. Gainera, Europako espazio atlantikoaren etorkizunaren eraikuntzan tokiko gobernuek ahots aktiboa izateko beharra defendatuko du.

Halaber, agenda atlantiko komun bat bultzatzeko orduan hirien, eskualdeen, estatuen eta eragile sozioekonomikoen arteko gobernantza eta lankidetza indartzearen garrantzia azpimarratuko du Aburtok. Ildo horretan, balioa emango dio Bilbok eta haren portuak Europaren eta munduaren arteko lotura-nodo estrategiko gisa egiten duten ekarpenari, bai eta makroeskualde atlantiko bat sortzearen premiari ere, azpiegiturak hobetzeko, lurralde-konexioak indartzeko eta garapen jasangarriagoa, lehiakorragoa eta kohesionatuagoa sustatzeko Arku Atlantikoko lurralde guztientzat.