Datorren igandean, martxoaren 8an, suhiltzaileen zaindaria ospatuko da, San Juan de Dios egunean. Horren harira, Bilboko Udalak omenaldia egin die astearte honetan goizean iaz erretiratutako suhiltzaileei. Juan Mari Aburto alkatea izan da Arabiar Aretoan ospatu den ekitaldiaren buru, eta bertan hiriaren aintzatespen ofiziala helarazi die zerbitzu publikoan eta herritarren segurtasunean jardun duten gizon-emakumeei.
Data hori bereziki garrantzitsua da Suteak Prebenitu eta Itzaltzeko eta Salbamenduko Zerbitzuarentzat. Ospakizunean zehar, oroigarri bat eman zaio omendutako pertsona bakoitzari, egindako zerbitzu-urteengatik eskerrak emateko.
Alkateak eskerrak eman dizkie. Azpimarratu duenez, “Bilbo hiri seguruagoa da gaur egun, suhiltzaileen lantaldeko kide izan direnen konpromisoari, profesionaltasunari eta entregari esker. Omenaldi hau, batez ere, hiriak behar izan dituenean zalantzarik gabe erantzun duten gizon-emakumeei eskerrak emateko keinu kolektiboa da”.
Ernestoren omenez
Era berean, Ernesto izan du gogoan, duela gutxi hil den suhiltzailea. "Gure maitasun eta errespetu guztia helarazi nahi diogu familiari. Haren bokazioa eta zerbitzua beti egongo dira hiriaren oroimenean".
Ospakizunak joan den larunbatean hasi ziren, Miribillako parkeko ohiko ate irekien egunean. Bertan, familia askok hurbiletik ezagutu zituzten zerbitzu honen lana, baliabide teknikoak eta eguneroko eginkizunak. Ospakizunak datorren asteburuan amaituko dira, jardunean dauden suhiltzaileak eta erretiratuak bilduko dituen ermandadearen bazkari batekin, zerbitzuaren ezaugarri diren adiskidetasun-loturak indartuz.
