Ostiral honetan, martxoaren 21ean, planeta osoan ospatuko den Basoen Nazioarteko Egunarekin bat eginez, Sestaoko Udalak Ondejeda parkean haritzak landatzeko kanpaina bat jarriko du martxan, aste osoan zehar garatuko dena.
Ekimen horren helburua da ekosistema horiek klima-aldaketaren aurkako borrokan duten garrantzia nabarmentzea eta haien degradazioaren arriskuaz ohartaraztea.
2012an aldarrikatu zuen Nazio Batuen Batzar Nagusiak martxoaren 21a Basoen Nazioarteko Egun gisa. Martxoaren 21a, hain zuen, aukeratu zen Boreoko hemisferioko udaberriko sarrerarekin eta Australeko udazkeneko sarrerarekin bat etortzeagatik.
Ospakizunarekin bat egiteko, astelehenean hasi dira haritz-aldaxkak landatzen Galdamesko trenbide zaharreko tunelaren ahoaren gainean dauden lurretan, eta ekimena ostiralean amaitzea aurreikusten da.
Zerbitzuen arloko arduraduna den Rosa del Palacioren kalkuluen arabera, Bizkaiko Foru Aldundiak utzitako 3.000 haritz-landare inguru landatuko dira. Aste honetan landatu ezin direnak Udaleko lorezaintza-taldeek landatuko dituzte datozen asteetan.
Landaketa-jardunaldiaren hasieran, parte-hartzaileei hitzaldi bat emango zaie zuhaitzek gure gizartean duten garrantzia eta gure ekosistemari ekartzen dizkioten onura ugariak azaltzeko. Rosa del Palaciok azaldu duenez, Udalak ekimen horrekin lortu nahi duen helburuetako bat da "Sestaoko haurren artean kontzientzia sortzea, berdeguneak balioetsi eta zaindu ditzaten". Era berean, adierazi du beste helburu bat dela "azpiegitura berde bat sortzea, Sestao inguratu eta, gerora, gure herriari itzala, ongizatea eta berroneratzea emango dizkiona".
