Urtero bezala, Bilboko Udalak bat egingo du larunbat honetan, martxoaren 21ean, ospatuko den Arraza-diskriminazioaren aurkako Nazioarteko Egunarekin. Herritarrak sentsibilizatzeko asmoz, hainbat ekimen babestu ditu.
Duela gutxi onartutako 2026-2030 aldirako Arrazakeriaren aurkako EBren Estrategiak tokiko agintarien funtsezko zeregina eta udalerriek arrazakeriaren aurkako borroka gobernantza osoan txertatzeko daukaten desafioa nabarmentzen ditu. Arrazakeriaren aurkako borroka ez da hirien kezka marjinala, hiri-gobernantza eraginkor eta inklusiboaren funtsezko dimentsioa baizik.
Europako Estrategia sentsibilizaziotik ekintza sistemikoaren proposamenera igaro da, eta egiturazko arrazakeria EBren politikak formulatzeko erdigunean kokatu du hainbat eremutan, hala nola enpleguan, hezkuntzan, etxebizitzan eta osasunean. Hiru kapitulu nagusi ditu: diskriminazioaren eta gorroto-delituen aurkako legeen aplikazio zorrotzagoa; berdintasuna eta gizarte-kohesioa indartzea; eta aliantzak gizarte zibilarekin, berdintasun-erakundeekin, sektore pribatuarekin eta gobernu-maila guztiekin.
Bilboko Udalak, egun hori dela eta, Karina Senatore andreak egindako kanpaina grafiko bat bultzatu du. Duela gutxi, Emakume Artista kategorian aintzatetsi dute, Bilboko Udalak garatzen duen Bilboko emakume migratuen urteko VII. Aitorpenaren eta Immigrazioaren Tokiko Kontseiluaren esparruan. Haren ilustrazioa orientazioaren eta etorkizun partekatuaren ideiatik abiatzen da, arraza-diskriminazioaren aurkako konpromiso kolektiboaren metafora gisa. Irudi nagusiak andrazko baten aurpegia erakusten du, eta horren gainean berehalako orainalditik harago begiratzeko beharra irudikatzen duten elementuak gainjartzen dira. Oro har, gogoeta lasaia eta irekia proposatzen du kartelak: etorkizun bidezkoago baterantz orientatzea modu kolektiboan, non aniztasuna ez den oztopo bat, funtsezko balioa baizik.
Jarduerak
Carne y Arena (EITBren egoitza) + Hausnarguneak (Itsas Museoa)
Alejandro González Iñarritu zinemagile mexikarraren Carne y Arena murgiltze-esperientzia (birtualki orainaldia, fisikoki ikusezina). EITBren Bilboko egoitzako 5. platoan egongo da ekainaren 20ra arte.
Bilboko Udalak, Bizkaiko Foru Aldundiko Enplegu, Gizarte Kohesio eta Berdintasun Sailak, BBK Fundazioak eta EITBk sustatzen dute erakusketa hau, aliantza publiko-pribatu bat egin baitute, giza eskubideekiko, kulturarteko bizikidetzarekiko eta gizarte-kohesioarekiko konpromiso instituzionala sendotzen duena.
Esperientzia horren osagarri, ZAS! Zurrumurruen aurkako Sarearen eta Bilboko Zurrumurruen Aurkako Sarearen laguntzarekin antolatu da Hausnargune espazioa (Emoziotik ekintzara). Kulturarteko elkarrizketarako gune seguruak dira, CARNE y ARENA erakusketaren banakako esperientzia hausnarketa kritikoko eta bizikidetza eraikitzeko prozesu kolektibo bihurtzeko aukera emango dutenak. Bilboko Itsasmuseoan egingo dira prozesu horiek, 18:00etatik 19:30era.
Emi Larrondo ikertzaile eta aktibista feministak eta arrazakeriaren aurkakoak dinamizatuko ditu, eta Candela Radioren laguntza izango du.
Damba Festival (BBK aretoa)
Euskal Rap elkarteak bultzatutako Bilbao Damba Festival jaialdiaren seigarren edizioa egingo da gaur Bilbon, 18:00etatik 23:00etara. Denbora horretan, musikaren, dantzaren eta modaren munduko hainbat artista arituko dira.
Damba kultur gune bat da, arraza-aniztasuna, genero-aniztasuna eta LGTBIQ+ ordezkatzen dituzten artistak hartzen dituena. Ahalduntzeko espazioa da, agertokira igotzeko aukera handirik ez duten artistak eta atzerrian aintzatespen handia izan arren kultura-agendetan agertzen ez diren artistak ikusarazten dituena.
Edizio honetako artisten artean bertoko erreferenteak daude, esaterako Suprah, Tumbao global, Olfa Sendesni, African vibes eta Lovalois. Gainera, Portugaleko PONGOren emanaldia izango da, Europako musika-panoraman kuduro generoko afrikarren ondorengo artista nabarmenetako bat, eta Angolako Scro k cuia, artista txundigarri eta solidarioenetako bat, afrikar komunitatearentzat erreferente den artista.
