Koronabirusaren pandemiak kalte handiak eragin ditu kulturaren sektorean, kultur-espazioak denbora luzez egon baitira itxita. Hori dela eta, sektoreari bideratutako dirulaguntzen deialdi berri bat ireki egingo du Getxoko Kultur Etxeak.
Aldi berean, ekimen berri bat ere sortu da, RKbekak egoitza musikalak, musika-proiektuak garatzeko. Bi deialdi horiek Udalak aurten bertan bultzatutako Getxo Ekinez planaren baitan kokatzen dira, osasun krisiaren ondorioak hainbat sektoretan arintzea helburu duena, besteak beste, kulturan.
Kultura-sormenerako laguntzen deialdiak harrera bikaina izan zuen lehen edizioan, eta 125 proposamen jaso zituen. Hori dela eta, aurten ere egingo dira. Getxon bizi diren eta adinez nagusiak diren pertsona fisikoei zuzenduta dago, hainbat esparrutan arte-lanak egiteko sorkuntza-prozesuak egin nahi dituztenei. Era berean, diru-laguntzak gure udalerritik kanpoko pertsonei ere zuzenduta daude, Getxorekin lotura estua duten horrelako proiektuak aurkezten badituzte.
Irantzu Uriarte Getxoko Kultur Etxeko presidentearen hitzetan, laguntza horiekin «kultur sektorearekin zerikusia duten pertsonei lagundu nahi zaie, baita sorkuntza prozesuak bultzatu ere».
Bestalde, Xabier Paya Kultura Etxeko zuzendariak azpimarratu duenez, «abiarazitako deialdiak Eusko Jaurlaritzak pentsatutako herri estrategiaren barruan kokatzen dira, eta, zehazki, kultura industrien garapenaren esparruan». Halaber, gaineratu du Getxo erakustaldiaren esparruan erreferente bat dela, jaialdi eta bestelako ekitaldi ospetsuekin, baina sorkuntzaren alorrean ere nabarmendu nahi duela.
Deialdi horrek 120.000 euroko aurrekontua du, eta diru-laguntzak zazpi kategoriatan banatuko dira: sorkuntza eszenikoa (antzerkia eta dantza), ikus-entzunezko lanak (ikus-entzunezkoak edo zinematografikoak), musika-konposizioak, literatura-lanak eta ilustrazioa (eleberria, ipuina, poesia, komikia, ilustrazioa), haur eta gazteentzako hezkuntza-proiektu kulturalak, ikusizko lanak eta lan plastikoak eta bestelako sormen-diziplinak (gainerako kategoriei ez dagozkienak).
Proiektuak aurkezteko epea urriaren 15era arte egongo da zabalik. Amaitu ondoren, adituen batzorde batek baloratuko ditu jasotako lanak, eta hautatutakoak gutxi gorabehera hiru hilabeteko epean jakinaraziko dira. Deialdiari buruzko informazio osoa hemen eskura daiteke.
RKBEKAK
Bestalde, aurten musika-proiektuak garatzeko egonaldi artistikoen deialdia ere zabaldu da. Ekimen honen bitartez euskal kultura-sektorean sortzen ari diren bakarlarien edo taldeen hazkundea, garapen profesionala eta elkarrekintza bultzatu nahi da, espazioak, baliabideak eta zuzkidura ekonomikoa erraztuz.
Ekimenak bi egonaldi eskainiko ditu, eta horietako bakoitzari 12.000 euro esleitu zaizkio. Hautatutako bi proiektuak 10 hilabetez garatu beharko dira, 2021eko abendutik 2022ko irailera bitartean, Romo Kultur Etxean, eta partaideek entsegu-lokalak eskuragarri izango dituzte bertan. Ekitaldi horretan, gainera, publikoarekin elkarrekintzan aritzeko hainbat jarduera egin beharko dituzte hautatuek, hala nola, abestien aurkezpena, ikasleentzako edo herritarrentzako hitzaldi-kontzertua, musika-pieza baten grabazioa eta bi emanaldi, bata egonaldian zehar lana aurkezteko, eta, bestea, Muxikebarri zentroan.
Deialdia horretan parte hartu ahal izango dute Getxon erroldatuta dauden adin nagusiko pertsona fisikoek, baldin eta musika-arteetan lan egiten badute, bakarka edo taldean. Eskaerak aurkezteko gehienezko epea urriaren 18an amaituko da, eta proiektuak ebaluatu ondoren, epaimahaiak hiru hilabeteko epean jakinaraziko die bi hautagaiei, gutxi gorabehera.
