Eretzak herritarrentzako etxebizitza arreta zuzeneko zerbitzua eskainiko du

Barakaldok etxebizitzaren arloan zuzeneko arreta emateko zerbitzu bat jarri du martxan herritarrentzat Eretza auzoan. Zehazki, Etxebizitza, Kudeaketa eta Hirigintza Plangintzako sailak kudeatuko du zerbutru berri hau, Gizarte Kohesioa eta Aniztasunaren Kudeaketa arloarekin koordinatuta. Helburua da udalerriko herritarren eskaerei eta beharrei erantzutea.

Hala jakinarazi du Eretzatik Juan Antonio Pizarro arloko zinegotzi delegatuak, Nuria Rodríguez Gizarte Kohesioaren eta Aniztasunaren Kudeaketaren arloko zinegotzi delegatuarekin batera.

Pizarrok zehaztu duenez, etxebizitzaren arloko bi arloen arteko koordinazioa "ekintza-plana egitean lortu genuen konpromisoa izan zen, Barakaldo bizitegi-merkatuko gune tentsionatu izendatzeko, eta lan bateratu horretan aurrera egiten ari gara".

Pizarroren ustez, "beharrezkoa da zerbitzu hau martxan jartzea herritarrei erantzun eraginkorrak emateko etxebizitzaren arloan, hala nola azterketa ekonomiko bat egitea, Etxebiden eskaria kontrolatzea, etxebizitza publiko eta babestua eskatzeko beharrezkoak diren izapideei buruzko aholkularitza jasotzea, laguntzak eta dirulaguntzak kudeatzea, alokairua eskuratzea edo etxebizitza erostea".

Halaber, baliabide horri esker, "Barakaldoko herritarrekin zuzenean hitz egiteko zerbitzua eskainiko da, eta Gizarte Kohesioaren arloarekiko koordinazioa indartuko da, erabiltzaileek gertuko aholkularitza integrala eta beren beharretara egokitutakoa jaso dezaten".

Zerbitzu berria

Orain arte, Eretzak dirulaguntzak ematen zituen, bai etxebizitzak birgaitzeko, bai gazteak emantzipatzeko, bai udaletan, bai autonomia-erkidegoetan. Gainera, etxebizitza alokairuan jarri nahi duten pertsonek aukera onuragarrienei buruzko informazioa jasoko dute, bai jabeentzat, bai maizterrentzat. Eretzak alokairuko etxebizitzen eskatzaileen poltsa bat ere badu Barakaldon.

Zerbitzu horri esker, arreta etxebizitzaren arloan zentralizatu ahal izango da, eta dagoeneko martxan dago. Eretzako teknikariek emango diote arreta, astelehenetik ostiralera, 09:00etatik 14:00etara.

Bestalde, Nuria Rodríguez zinegotzi delegatuak adierazi duenez, "Gizarte Kohesioak kudeatzen du Barakaldoko etxebizitzari buruzko udal ordenantza, eta, beraz, oso garrantzitsua da informazioa partekatzea eta erakundeen artean koordinatzea, herritarrei ahal den guztian laguntzeko".