Bilbok 'Zurrumurruen aurkako I. bienala-What de fake sariak' babestuko ditu

Diversit Kulturarteko Hirien Estatuko Sarearen (RECI) Elkarte Koordinatzaileak antolatutako 'Zurrumurruen aurkako I. bienala-What de fake sariak' babestuko ditu Bilboko Udalak. Horren helburua informazioaren eta aurreiritzien aurkako proiektu eraldatzaileei aitortza egitea da.

Diversit Kulturarteko Hirien Estatuko Sarea koordinatzen duen elkartea da, baita Zurrumurruen Aurkako Global estrategiaren sustatzailea ere, eta estatu- eta nazioarte-mailako deialdi hau abiarazi du ofizialki, zurrumurru, estereotipo eta narratiba diskriminatzaileei aurre egiten laguntzen duten proiektu berritzaileak identifikatu, aitortu eta ikusarazteko. Deialdia urriaren 1era arte egongo da zabalik.

Bienala RECI sareko kide diren hiriekin batera diseinatu da, eta bizikidetza inklusiboago eta demokratikoago baten alde lan egiten duten hiriek, gizarte-erakundeek, ikastetxeek, gazteen kolektiboek, administrazio publikoek eta nazioarteko proiektuek bultzatutako esperientzia eraldatzaileen balioa azpimarratzeko sortu da.

Kategoriak

Hala, hainbat kategoria ditu, besteak beste:

• Radar Gaztea saria – Gazte-ekimen onena
• Inpaktua duten sareen saria – Parte-hartze komunitarioa
• Zurrumurruen aurkako anplifikadorearen saria – Komunikazio-kanpaina
• Capacita-Lab saria – Prestakuntza eta pentsamendu kritikoa
• Zurrumurruen Aurkako Global saria – Nazioarteko ekimena

2025ean edo 2026an garatutako ekimenak aurkeztu ahal izango dira sariketara, eta ezinbestekoa izango da proiektuak zurrumurruen aurkako ikuspegiaren printzipioekin bat etortzea: parte-hartze komunitarioa, diskriminazioaren prebentzioa, pentsamendu kritikoa, sormena, intersekzionalitatea eta giza eskubideak.

Balorazio-prozesua egitean, epaimahai profesional baten ebaluazioa eta Kulturarteko Hirien Estatuko Sareko (RECI) lurraldeek egindako bozketa konbinatuko dira, eta, horrela, lehiaketaren izaera kolektiboa eta komunitarioa indartuko da.

Saritutako proiektuek, aitortza publikoa eta Estatuan eta nazioartean zabalkundea lortzeaz gain, Diversit-eko taldearen laguntza profesional espezializatua jasoko dute. Sariak 2026ko urritik azarora bitartean emango dira.