Herritarren segurtasun-pertzepzioa hamarretik 5,58koa da Bilbon

Azken urteetan ohi bezala, Bilboko Segurtasunaren aldeko lehen Itunean jasotako konpromisoetako bati erantzuten, Bilboko Udalak Segurtasun Pertzepzioaren eta Biktimizazioaren 2025eko Azterlanaren emaitzak ezagutzera eman ditu astearte honetan goizean, otsailaren 17an.

Ituna Udalean ordezkaritza zuten alderdi politiko guztiek sinatu zuten 2018ko martxoan.  2024ko uztailean ituna luzatu zenean, neurri hau berriro ezarri zen.

Azterlan honen helburua da biztanleriari funtsezko paper bat ematea herritarren segurtasuneko politika publikoen diseinuan eta ebaluazioan. Azterlanaren ikuspegia prebentzioan, bizikidetzan, gardentasunean eta legez kanpoko jokabideen aurkako irmotasunean oinarritzen da.

2025eko emaitzek erakusten dute Bilboko herritarren segurtasun-pertzepzio orokorra 5,58 puntukoa dela hamar puntutatik, aurreko urtekoa baino pixka bat txikiagoa; hala ere, nota hori hobetu egiten da ingurune hurbilago bateko pertzepzioaz galdetzen bada, adibidez auzoko segurtasun-pertzepzioaz; parametro horretan, 5,70eko nota ematen dute inkesta egin duten pertsonek. Hala eta guztiz ere, adierazleen azterketa xeheak agerian uzten du bilakaera positiboa izan dela egiturazko alderdietan eta alderdi xehatuetan. 

8.580 inkesta

IKERFELek egin du ikerketa, hiriko barruti guztietan bizi diren 16 urtetik gorakoen artean 8.580 telefono-elkarrizketa eginez. Landa-lana 2025eko martxotik abendura bitartean egin da.

Delinkuentziaren pertzepzio konparatuari dagokionez, inkestatutako pertsonen % 79,9k uste du Bilbon beste hiri batzuetan baino delinkuentzia-maila txikiagoa edo berdina dagoela. Datu horrek hobetu egiten du 2024an erregistratutakoa –% 77,7–, eta indartu egiten du Bilbo –bere testuinguru urbanoan– hiri segurua izatearen pertzepzio erlatiboa.

Bilbon, gaueko segurtasun-pertzepzioa 5,24 puntukoa da; auzoan, berriz, gaueko segurtasun-pertzepzioa 5,70 puntukoa da. Horrek, beste behin ere, hurbileko ingurunearen balorazioa positiboagoa dela erakusten du. 

Barrutika, puntuazioak antzeko balioetan mantentzen dira, aldaketa txiki batzuekin zonen artean:

• Deustu: 5,83
• Uribarri: 5,79
• Otxarkoaga-Txurdinaga: 5,66
• Begoña: 5,47
• Ibaiondo: 5,48
• Abando: 5,44
• Errekalde: 5,56
• Basurtu-Zorrotza: 5,50

Herritarren eskaera nagusiei buruz galdetzen denean, "delinkuentzia gutxiago eta herritarren segurtasun handiagoa egotea" da oraindik kezka nagusietako bat, maila orokorrean.   Hala ere, gai horrek garrantzia galtzen du eremu pertsonalenera jotzen denean, etxera –inkestatutako pertsonen % 46,7ak aipatzetik % 22,6ak aipatzera pasatzen da–.

Biktimizazioari dagokionez, datuek erakusten dute delitu ohikoenak iruzur ez-presentzialak direla, batez ere bitarteko digitalen edo telefono-deien bidez egiten direnak. Ildo horretan, inkestatuen % 53k esan du iruzurren biktima izan dela (gauzatuak edo saiakerak).

Aldiz, delitu presentzialei lotutako biktimizazioak urria izaten jarraitzen du. Biztanleriaren ehuneko oso handi batek dio ez duela ebasketarik, indarkeriaz egindako lapurretarik edo sexu-erasorik jasan. Ildo horretan, delitu-ekintzen biktima izan direla dioten pertsonen ehuneko guztiek behera egin dute, ebasketa izan ezik, oso igoera txikia izan duena: 2024ko % 9,2tik, % 9,3ra 2025ean.

Adibidez, sexu-izaerako mehatxu edo erasoen biktima izan direla dioten pertsonak % 3,2tik % 2,5era jaitsi dira; bestelako mehatxu edo eraso fisikoren bat jasan dutela diotenak % 5,7tik % 5,5era; indarkeria edo larderia erabiliz egindako lapurretak jasan dituztenak % 2,7tik % 2,5era; eta kalteak, apurketak edo txikitzeak jasan dituztela diotenak % 9,8tik % 8,1era jaitsi dira.

Udaltzaingoaren balorazio positiboa

Azterlanak, era berean, Bilboko Udaltzaingoaren balorazio positibo eta egonkorra erakusten du. Herritarrek agenteekin izandako kontaktuari eman dioten balorazioa 7,27koa da, aurreko urtekoa (7,10) baino handiagoa.

Era berean, herritarrek Udaltzaingoak euren kasuaz egindako kudeaketarekin duten gogobetetasun-maila handitu egin da, 2024an 6,56 izatetik 2025ean 6,84 izatera igaro baita.

Gainera, inkestatuen % 86,5ak uste du Udaltzaingoaren eraginkortasuna hobetu edo mantendu egin dela azken urteotan. Hurbiltasuna, tratuaren adeitasuna, profesionaltasuna eta agenteen disponibilitatea bereziki azpimarragarriak dira.

Herritarren gehiengo handi batek uste du poliziaren presentzia egokia dagoela, eta inkestatuen bi herenak baino gehiagok diote egunero edo ia egunero ikusten dutela Udaltzaingoa euren ohiko ingurunean.

Oro har, Segurtasun Pertzepzioaren eta Biktimizazioaren 2025eko Azterlanaren emaitzek erakusten dute, pertzepzioaren adierazle globala pixka bat jaitsi den arren, Bilboren segurtasun-mailak ondo baloratzen dituztela herritarrek, eta bilakaera positiboa dagoela hiriko segurtasunaren pertzepzio erreal eta egunerokoa osatzen dituzten adierazle xehatu gehienetan.