Bilboko Udalak 253.040,38 euroko aurrekontua bideratuko du, BEZa barne, Errekalde auzoko Isabel Gallego Gorria HLHIko gimnasioko estalkia berritzeko, instalazio zaharrak hobetzeko eta eraikinaren egiturarako egokiagoak diren materialez hornitzeko. Lanak aste honetan hasi ditu, beti bezala, udan eskola-jarduerarik ez dagoela aprobetxatuz. Gutxi gorabehera lau hilabeteko exekuzio-epea izango dute.

Isabel Gallego Gorria HLHI Eskola Eraikuntzen Larrialdi Planaren esparruan eraiki zen 1971 eta 1973 artean. Bost hamarkadako bizitza erabilgarriaren ondoren, hainbat esku-hartze egin dira eraikinean, urteetan zehar eraikuntza-elementuen pixkanakako degradazioa lehengoratzeko.

Testuinguru horretan, gimnasioaren eraikinaren estalkiak estankotasuna hobetzeko aldizkako jarduketak behar izan ditu, hura estaltzen duten metalezko panelak konponduz; Hezkuntza Sailak erabaki du panel horiek erabat berritzea, "hiriko eskola publikoaren instalazioak hobetzeko", Eider Bilbao Hezkuntzako zinegotziaren hitzetan.

Bestalde, proiektuak aldageletan jardutea ere aurreikusten du, tipologia bereko beste ikastetxe batzuetan iragazketak saihesteko jada egindako obren antzera.

Zizeruena plaza berroneratzeko obrak

Bestalde, Udalak Otxarkoaga auzoko Zizeruena plaza berroneratzeko obrak hasi berri ditu. Jarduketa hori Bilboko auzoak hobetzeko Auzokide Planaren barruan sartzen da eta, beraz, inguruko bizilagunek, 3. barrutikoek, lehenetsi dute.

Proiektu honen helburua da plazaren estetika orokorra eguneratzea eta espazioa berriro antolatzea, herritarrek hobeto erabil dezaten. Horretarako, Udalak landaretza duten eremu berriak sortuko ditu, hiri-altzariak berrituko ditu eta irisgarritasuna eta argiztapena hobetuko ditu.

Egoteko gune bi sortuko dira, 27 eta 12,5 metro koadroko parterre handi bitan kokatuko direnak, hurrenez hurren. Guztira, hogeita bat eserleku kurbatu sartuko dira, gehi hiru plazako lau eserleku eta sei aulki independente; horrela, gaur egun daudenak hirukoiztuko dira.

Landarediari dagokionez, gaur egungo zuhaitzak kontserbatuko dira eta zortzi ale berri landatuko dira, gerizpe handiagoa emango dutenak. Gainera, 40 metro karratuko zuhaixka-parterreak egingo dira, plazari estetika- eta ingurumen-balioa gehituko diotenak.

Guztira 353.201,60 euro (BEZa barne) gorde dira lau hilabeteko egikaritze-epea duen obra honetarako.