Elementu inklusiboak dituen jolasgunea inauguratu da San Inazion

Bilboko Udalak 187.738,47 euroko aurrekontua bideratu du, BEZa barne, San Inazio auzoko Levante plazako jolasgune inklusibo berria egiteko. Astelehen honetan goizean, maiatzaren 5ean, lan horiek amaitutzat eman ditu eta parkea inauguratu du.

Gurpil-aulkian dauden pertsonentzat egokitutako eremu berri bat da, elementu inklusiboak dituena, hala nola kulunka egokitua (lehenengoa Bilbon) eta karrusel birakaria.

Elementu horiek dibertsioa, sozializazioa, oreka eta jolasa estimulatzen dituzte, eta gurpil-aulkietan dauden haurrei mugimenduak eta gorputzaren koordinazioa kontrolatzen ikasteko aukera ematen diete, jarduera psikomotorra hobetuz.

Espazio hori Aspace (irabazi-asmorik gabeko elkartea, onura publikokoa deklaratua, garun-paralisia duten gaixoei eta haien senideei laguntzeko erakunde nagusiak hartzen dituena) zentroaren aurrean dago eta kautxuzko zoladuraz mugatuta dago.

Lan horiekin amaitutzat ematen da duela aste batzuk hasi zen inguruaren hobekuntza, plazako pergolak zaharberritu baitziren.

Estalkietan, lehendik zegoen polikarbonatoaren ordez –zati batzuetan plazaren azalera erabat estaltzen ez zuena–, polikarbonato zelularreko panelak jarri dira, zeharrargiak eta erresistenteak. Gainera, pergolen eta horien zutabeen egitura metalikoak lixatu, saneatu eta margotu dira. Eta zoladura sakon garbitu da.

Auzokide Plana

Levante plaza hobetzeko jarduketa horiek uriko auzoak hobetzeko Auzokide Planaren barruan sartzen dira eta, beraz, Deustuko 1. barrutiko bizilagunek lehentasuna eman diete.