Euskal Herria, zazpi lurraldetako Euskadi, bihotzean daramagunok Urriak 24ean berri on batekin oheratu ginen. Nafarroak eta Euskal Autonomia Erkidegoak 2016az geroztik bi erkidegoetako gobernuek Nafarroan euskal ikus-entzunezko erakunde publikoaren zerbitzuak zabaltzeko eta emititzeko mantentzen duten lankidetza-hitzarmena berritu dute. Akordio honek Nafarroan EITBren irismena, hurbiltasun edukiak eta Nafarroako egungo errealitate politiko, ekonomiko, sozial eta kulturalak indartzeko konpromisoa jasotzen du. Batez ere eta bereziki haurrentzako programazioa euskaraz. Hitzarmenak bi urteko indarraldia du eta urtero luza daiteke. Bi gobernu sinatzaileek Nafarroan emisioa zabaltzeko eta hobetzeko beharrezko neurriak hartzeko konpromisoa hartzen dute. Nafarroakoak lan egingo du EITBren zerbitzuak Nafarroa osoan eskaintzeko, haien irudiak, ordutegiak, markak eta identifikazio seinaleak errespetatuz. Nafarroakoak konponbide tekniko egokienak garatzeko konpromisoa hartzen du eskura dauden baliabideekin.
Eusko Jaurlaritzak konpromisoa hartu du EITBk bere programazioaren zati bat Nafarroako tokiko edukietarako gorde dezan, bere errealitate instituzionala eta soziala islatuz. Eduki hauek Nafarroaren sinboloak eta nortasuna, bere sentsibilitate politiko eta ideologiko desberdinak jaso eta errespetatu behar dituzte, horrela iritzi publiko plurala eratuz elkarlanean. Nafarroa EAEtik bereizitako errealitate gisa aurkeztuko da. Bestalde, Eusko Jaurlaritzak Nafarroako ikus-entzunezkoen sektoreko enpresekin lankidetza bultzatu eta sustatzeko konpromisoa hartu du. EITBren presentziak Nafarroan badu bere arrazoia, garbi baitago EAEkin duen kidetasun historiko, kultural, linguistiko, turistiko eta soziokulturala lankidetza-tradizio luzez. Bi erkidegoek kultur eta hizkuntza erakundeen sorreran eta garapenean elkarrekin bultzatu eta parte hartu izan dute lankidetzan, bai eta arlo ezberdinetako hitzarmen sektorialak sinatuz. Zazpiak bat. Bai, urriak 24ean berri on batekin oheratu nintzen.