Datorren asteazkenean, azaroaren 3, Arriaga Antzokia 'Charadas' ikuskizuna hartuko du. Han dantza, antzerkia eta komedia nahastuko dira Krego-Martin Danza konpainiari esker. Antzokia jakinarazi duenez, espektakulu hau 19:30etan hasiko da gozatu nahi duenari.

Bi emakume antzezle agertokira igotzen dira ikusleak dibertitzeko eta hunkitzeko, dantza garaikidea eta komedia aliatuak izan daitezkeela erakusteko adorearekin. Bi ahizpa dira, elkarrekin bizi direnak, biak bakarrik etxe berean… batek daki noiztik. Haien arteko harremanean boterea, hierarkia, maitasuna eta isolamendua nahasten dira (batzuetan).

Ikuskizunean izar handia den Roseta (Bego Kregok antzezten duena) ahizpa nagusiaren iragan artistikoak eta Isidora gazteak (María Martín) aurrean daukan etorkizun irrikatsuak errealitate barregarria eratzen dute: konplexurik gabe boteretsu, sentikor, suhar eta zintzo agertzen den mundu femeninoa. Isidorari Madonna gustatzen zaio... bere keinu eta artikulazioekin, hegoei eraginez eta atmosfera zeharkatuz, eszenan korapilatzen eta limurtzen duten afektuak eta efektuak marraztuz. Rosetak Augustorena egiten du, aurpegiarekin eta gorputzarekin egiten dituen imintzio eta keinuekin. Roseta heldua eta limurtzailea da, eta gaur egun hainbeste emakumek pairatzen duten arreta sexual eza erreklamatzen du.

Emakume horien bitartez, dantzak eta hitzak naturaltasunez hartzen dute agertokia, eta ikuskizun berritzaile eta, agian, sailkaezin hau inguratzen du komediak. Izan ere, ez da inoiz hain harreman esturik egon dantza garaikidearen eta barrearen artean. Badirudi artistikoa den guztia serioa dela edo izan behar duela, algararik gabea. Krego-Martín Danzaren iritziz, dantza garaikidearekiko irisgarritasuna auzi garrantzitsua da, eta barrea lagungarri izan daiteke helburu horretan. Ikuskizun hau, zalantzarik gabe, dantzaz harago doa, alderdi estetikoan oso ederra den proposamen dibertigarri hau osatzen duten elementu komiko eta teatralei esker.