Getxoko Udalak Segurtasun Eskema Nazionalaren ziurtagiria lortu du

Udalaren zerbitzu digital nagusiek beharrezko segurtasun-baldintzak betetzen dituztela egiaztatzen duen Segurtasun Eskema Nazionalaren -ENS- araberako ziurtagiria lortu berri du Getxok, kategoria ertainean, Egoitza Elektronikoaren eta Udal Administrazio Elektronikoaren Bulegoaren euskarri diren sistemetarako.

Aitorpen horren ondorioz, Getxo da ziurtagiri hori lortu duen Bizkaiko lehen udala, eta urrats berri bat da Udala egiten ari den eraldaketa digital sakonaren barruan. 5 milioi euroko inbertsio globala egiten ari da administrazioa modernizatzeko, zerbitzu publikoak hobetzeko eta udal sistemen segurtasuna indartzeko.

Zaloa Campillo Eraldaketa Digitaleko zinegotziak nabarmendu duenez, “ziurtagiri hori ez da zigilu teknikoa soilik; Getxo eraldaketa digital serioa, sakona eta inbertsio errealekoa egiten ari den froga da, talde-lanean eta ahalegin handiz. Udala barrutik modernizatzen ari gara, herritarrek kanpotik nabaritu dezaten: izapide arinagoetan, administrazio prestatuagoa, baina, batez ere, seguruagoa”.

ENS ziurtagiria

ENS ziurtagiriak egiaztatzen du betetzen dela maiatzaren 3ko 311/2022 Errege Dekretua, administrazio publikoek zerbitzu elektronikoak ematen dituztenean bete behar dituzten gutxieneko segurtasun-baldintzak arautzen dituena.

Praktikan, horrek esan nahi du udal sistema digitalek neurriak hartzen dituztela informazioa, datuak, komunikazioak eta zerbitzu elektronikoak hobeto babesteko. Hau da, pertsona batek Egoitza Elektronikoaren bidez izapide bat egiten duenean, ingurune sendoagoan eta berme gehiagoz egiten du.

Udalaren Egoitza Elektronikoak eta Administrazio Elektronikoaren Bulegoak hainbat kudeaketa telematikoki egiteko aukera ematen dute, beharrezkoak ez diren joan-etorriak saihestuz eta udal administrazioarekin harreman erosoagoa erraztuz.

Kategoria ertaineko ENS ziurtagiria nahitaezkoa da administrazio publikoentzat, baina oraindik udal gutxik amaitu dute prozesu hori. Horregatik, Getxo Bizkaiko lehen udalerria izateak islatzen du Udala behar digital berrietara egokitzeko egiten ari den lan teknikoa, antolaketakoa eta ekonomikoa.

Aurrerapen hori eraldaketa askoz zabalagoaren parte da: kontua ez da soilik teknologia txertatzea, baizik eta Udalaren lan egiteko modua aldatzea, prozesuak antolatzea, segurtasuna indartzea, herritarren arreta hobetzea eta udal administrazioa egungo eta etorkizuneko erronketarako prestatzea.

Ziurtagiri horri esker, Getxok beste urrats bat eman du administrazio modernoago, seguruago eta hurbilago baterantz, non teknologia pertsonen eta kalitate handiagoko zerbitzu publikoen zerbitzura dagoen.