Durangok edateko uraren azpiegiturak berrituko ditu San Inazion

Aurrera doa Durangoko Udala herriko edateko uraren horniduraren kalitatea hobetzeko eta inguruko bizilagunentzako zerbitzu eraginkorragoa eta seguruagoa bermatzeko beharrari erantzuten dion programarekin. Oraingo honetan, udal brigadak San Inazio auzoan edateko uraren lurpeko instalazioak sakon berrituko ditu.

Duela zenbait hilabete, matxurak antzeman ziren San Inazioko hainbat auzoko etxebizitza-bloketan edateko urez hornitzen dituzten hodietan. Fibrozementuzko hodi horiek 50 urte dituzte eta hondatu egin direnez, ur-horniduraren eraginkortasuna arriskuan jartzen zuten ihesak sortzen ziren. Egoera horren aurrean, Udalakhornidura azpiegituraren berrikuntza integrala egitea erabaki zuen.

Obrak

Lehen neurri gisa, duela hilabete batzuk, Agirre Lehendakariaren kalean obrak egin ziren, San Inazio 8. blokearen inguruan. Jarduketa horretan, bloke horretarako edateko uraren hornidura bermatu zen, fibrozementuzko hodi zaharra zerbitzuz kanpo utziaz. Gainera, suhiltzaileentzako ur-hartuneak berritu ziren, larrialdi egoeretan baliabide hori erabilgarri egongo zela ziurtatzeko.

Otsailaren 23tik aurrera, lanak esku-hartze eremu berri batean zentratu ziren, San Inazio 6 eta 7 blokeetan. Fase honetan, eremu horiek hornitzen dituen edateko uraren hodia berritzen ari dira. Aurreko fasean bezala, fibrozementuzko hodi zaharrak desgaitzen ari dira, eta sekzionamendu-balbulak instalatzen ari dira, horniduraren kudeaketa eta banaketa hobetzeko. Gainera, suhiltzaileentzako ur-hartuneak berritzen ari dira, larrialdietan baliabideak optimizatzeko. San Inazio parkeko iturriko ur-hargunea ere berritu da, eta horrek aisialdirako gune horretako uraren kalitatea hobetzen lagunduko du.

Proiektuaren helburua

Lan horiek ur-hornidura aldi baterako eteten ari dira, eta horrek eragozpenak eragin diezazkieke inguruko bizilagunei. Udalak badaki horrek deserosotasunak eragin ditzakeela, eta egoiliarren ulermena eskertzen du. Behar diren ahalegin guztiak egiten ari gara etenaldiak minimizatzeko eta ahalik eta azkarren berritzeko.

Proiektu honen helburua edateko uraren azpiegitura berriztatu eta eraginkortasuna hobetzea da, egungo arazoak konpontzeaz gain, etorkizuneko eragozpenak ere aurreikusiko dituena, San Inazio auzoko biztanleen ongizatea ziurtatuz.