Muskiz, edo hobeto esanda Muñatonesko Salazar Jauregia, izango da Kaligrafiari buruzko Jardunaldien bigarren edizioaren egoitza. Aurreko edizioak izandako harrera bikaina kontuan izanda, Bizkaiko Foru Aldundiko El Pobaleko burdinolak eta Muskizko Udalak bigarren edizioa antolatzen animatu dira. Lehenengo saioa datorren larunbatean izango da, otsailaren 28an, eta bigarrena, aldiz, martxoaren 14an.
Lehenengo saioa
Jardunaldiek Lope García de Salazar eta Aiara kantzilerra omenduko dituzte, Lumaren zaldunak izenburupean. Lehen hitzaldiak hizpide hartuko du Istoria de las bienandanças e fortunas Bizkaiko lehen kronika historikoa, Muñatoneseko dorrean idatzia. Consuelo Villacorta Macho izango da hizlaria, Filologia Erromanikoko doktore eta EHUko irakaslea. Obra bikain horretan espezialista da, eta doktore-tesia egin zuen haren gainean. Villacortak testuaren balio literario eta historikoa jorratuko du, eta Behe Erdi Aroko testuinguru politiko, kultural eta sozialean kokatuko du egilea.
Bigarren hitzordua
Bigarren hitzorduak Kexaako Biblia izango du ardatz, Erdi Aroko sorkuntza kulturalaren harribitxi bat. Luis Padura maisu errementariak ayalarrak azalduko du eskuizkribuak zer lotura duen Aiara kantzilerrarekin eta Kexaako konplexu monumentalarekin, bai eta dokumentuak arestian izan dituen gorabeherak ere. Ana Prestamero arte-adituak, begirada zabalagotuz, Erdi Aroko eskuizkribuen sailean kokatuko du lana. Marisa Lacarta kaligrafoak eta Javier Gandarillas ilustratzaileak, berriz, zuzeneko erakustaldia eskainiko dute kaligrafia historikoari eta argiztapenari buruz; horrekin, bertaratuek hurbiletik behatu ahal izango dituzte teknika tradizionalak.
