Durangoko Udalak aurrerapauso garrantzitsu bat eman du San Fausto auzoan kokatutako Kapitanena baserria eraberritu eta handitzeko obretan. Astelehen honetan goizean proiektuaren idazketa, obren zuzendaritza eta segurtasun- eta osasun-arloan koordinatzeko lizitazio-prozesua abiatu duela jakinarazi du.
Jarduera hau Kapitanena auzoaren zerbitzurako ekipamendu publiko berri gisa berreskuratzeko estrategiaren parte da, auzotarren eskaera historiko bati erantzunez.
Faustebide kaleko 26. zenbakian dagoen eraikin hau 1885ean eraiki zen eta 1985ean berritu zen azkenekoz. Urte luzez erabilerarik gabe egon ondoren, orain Durangoko Udalak espazio irisgarri eta inklusibo bihurtu nahi du, gizarte-, kultura-, jolas- eta elkarte-jarduerak hartzeko zentro zibiko gisa.
Proiektua 2024ko azaroan Aiert Buruaga Magunagoitia arkitekto durangarrak idatzitako aurreproiektuan oinarritzen da. Esku-hartzeak jatorrizko egitura mantentzea eta beheko solairuan handitze bat egitea aurreikusten du, eraikina auzoarekiko konektatzeko eta sarbide berriak sortzeko.
Kontratuaren irismena
Kontratazioa bi lotetan banatuta dago. Lehen lotearen bidez, egikaritze-proiektua idazteko eta lanen zuzendaritza egiteko zerbitzuak esleituko dira. Enpresa adjudikaziodunak dokumentazio tekniko osoa prestatu beharko du (memoriak, planoak, aurrekontuak, azterlan espezifikoak), betiere indarrean dagoen araudia betez, eta energia-eraginkortasuna, irisgarritasuna eta genero-ikuspegia bezalako irizpideak barne hartuta. Gainera, obren jarraipen tekniko eta ekonomikoa egingo du, astean behin obrak bisitatuz, udal taldearekin bilerak eginez eta amaierako dokumentazioa entregatuz.
Bigarren lotearen bidez, segurtasun- eta osasun-koordinazio lanak egingo dira obraren exekuzioan zehar. Zerbitzu honek Segurtasun eta Osasun Plana baliozkotzea, astero kontrol-bisitak egitea, parte hartzen duten enpresen dokumentazioaren kontrola, bileretan parte hartzea, hileko txostenak egitea eta arrisku larrien aurrean lanak geldiarazteko gaitasuna izango du. Informazio guztia Udalaren SharePoint plataformaren bidez kudeatuko da.
Epeak, aurrekontua eta eskaintzak aurkeztea
Kontratua sinatu ondoren jarriko da indarrean. Egikaritze-proiektua idazteko epea hiru hilabetekoa izango da, Plan Berezia behin betiko onartu eta gero. Obraren zuzendaritza eta segurtasunaren koordinazioa lanek irauten duten bitartean egingo dira, hamar hilabeteko exekuzio-epea aurreikusita dagoelarik, gehi azken neurketetarako hilabete bat eta likidazio-proiektua egiteko beste bi hilabete.
Kontratuaren oinarrizko aurrekontua, BEZik gabe, 77.966,81 eurokoa da. Ordainketak faseka egingo dira, lanen aurrerapen tekniko eta ekonomikoaren arabera, pleguetan jasotzen den moduan.
Interesatuta dauden pertsonek, enpresek edo talde teknikoek 2026ko urtarrilaren 19ra arte aurkez ditzakete eskaintzak Durangoko Udalaren Kontratatzailearen Profilaren bidez, Durangoko Udalaren webgunean eskuragarri dagoena. Bertan, baldintza-agiri osoa eta eskaintzak aurkezteko jarraibideak kontsultatu ahal izango dira.
