Autorik Gabeko Eguna ospatzeko programazio berezia prestatu du Sestaok

Datorren larunbatean, irailaren 20an, Autorik Gabeko Eguna ospatuko da mundu osoan, eta Sestaoko Udalak ekimen horrekin bat egiteko egitarau zabala prestatu egin du. Hala, goizeko 11:00etatik 15:30era bitartean, hainbat jarduera egingo dira Kasko plazan.

Mugikortasunaren Europako Astearen barruko ekimen hori Europako ehunka hiritan ospatuko da aurten, mugikortasun iraunkorragoa, seguruagoa eta osasungarriagoa bultzatzeko helburuarekin. Hitzordu horri atxikitzea eta aprobetxatzea garrantzitsua da, guztion artean Sestao hobea eraikitzen lagunduko duen hezkuntza-lana egiteko.​

Testuinguru horretan, Mugikortasun eta Garraio Sailak bereziki haur eta familientzat pentsatutako programa bat prestatu du, hainbat jarduera bilduko dituena: bide-hezkuntzako zirkuitu bat, bizikletaz egiteko oztopo-zirkuitu bat, mural kolaboratibo bat, puzgarriak txikienentzat eta, bigarren urtez jarraian, familientzako bizikleta-martxa, Rebonza Txirrindulari Klubarekin lankidetzan antolatua.​

Jardunaldi hau dela eta, Kasko plazarekin muga egiten duen Las Llanas zumarkaleko zatia trafikoari moztuko zaio. Aurten, Las Llanas zumarkaleko obrak direla eta, programak ezin izango du aurreko urteetako espazio osoa hartu, baina garrantzitsuena da Sestaoko hiri-espazioan aldaketa esanguratsuak egiten ari direla, oinezkoentzako espaloia irabazi eta pertsonentzat irisgarriagoa eta egokiagoa den udalerri baterantz aurrera egiteko.​

Arrate Azcarate Mugikortasuneko eta Garraioetako zinegotziak herritar guztiak animatu ditu heziketa helburu duen jai-jardunaldi honetan parte hartzera, baita mugikortasunaren garrantziaz hausnarketa egitera ere, pertsonei leku gehiago emango dien, bizikletaren edo garraio publikoaren erabilera sustatuko duen eta jasangarriago eta osasuntsuago izango den Sestao baten alde.​