Amorebieta-Etxanok segurtasun-dispositiboa indartuko du jaietan

Datorren asteazkenean, uztailaren 15ean, ohiko txupinazoak eta pregoiaren irakurketak hasiera emango diete Karmengo jaietako edizio berri bati Amorebieta-Etxanon. Badira egunak Udalak jaietako egitaraua aurkeztu zuenetik, eta ostiral honetan goizean jai-egun horietarako prestatutako segurtasun-dispositiboaren aurkezpena egin du Udalak.

Jaietako egitaraua itxita dagoela, Amorebieta-Etxanoko Udalak segurtasun-plan espezifiko bat diseinatu du egun hauetarako, guztiek giro seguru eta inklusiboan gozatu ahal izan dezaten.

Udaltzaingoak eta Ertzaintzak modu koordinatuan lan egingo dute, txanda guztietan presentzia indartuz. Kaleetan patruila bateratuak egongo dira, prebentzio-helburu argi batekin: lapurretak saihestea, alkoholaren eta drogen gehiegizko kontsumoaren ondoriozko jokabideak kontrolatzea, eta bereziki, eraso eta abusu sexistak prebenitzea.

Udaltzaingoaren buruak eta Durangoko Ertzain-etxeko Komisarioak dei egin diete herritarrei eta jaietan Amorebieta-Etxanora bertaratzen diren guztiei “errespetutik” goza dezaten, bai ospatzen ari diren gainerako pertsonekiko bai atseden hartu nahi duten bizilagunekiko. Era berean, edonork laguntza behar izanez gero edo edozein delitu-ekintza ikusiz gero, une oro eskuragarri egongo diren patruiletara joateko zalantzarik izan ez dezaten adierazi dute.

Udalak gogorarazi du jaietako segurtasuna guztion ardura dela, eta herritarren inplikazioa eta lankidetza eskatzen du, Karmengo Jai hauek ospakizun parte-hartzaile, errespetuzko eta seguruaren eredu izan daitezen.