Arrain Azoka, itsas ondareari omenaldia

Bermeo herria Arrain Azokaren XXXI. edizioa hartzeko prestatzen ari da. Maiatzaren 16tik 18ra ospatuko den Arrain Azoka honek arrantza- eta kontserba-tradizio aberatsa omentzen du. Horrela, hiru egunez, Lamerako parkea hiriko itsas ondarea ospatzen duten kultura-, gastronomia- eta hezkuntza-jardueren erdigunea bihurtuko da. Aurtengo edizioa berezia izango daAzokak Euskaraldiarekin bat egingo baitu eta Arrain Azokako egitarau osoa euskaraz izatea da helburua, hala ere, horretarako gaitasunik ez dutenek itzulpen zerbitzua izango dute eskuragarri, aurkezpena bideratzeko.

1994an sortu zen Arrain Azoka, Bermeoko itsas tradizioa eta jarduera horretatik sortu zen industria ezagutarazteko ekimen gisa, kontserbak, esaterako. Ordutik, Euskadin erreferentziazko ekitaldi gisa finkatu da, itsasoaren historian eta kulturan murgildu nahi duten milaka bisitari erakarriz.

Bermeoko Azokak herriko ondarea nabarmendu nahi du, arrantza-tekniken bilakaera, saregileen garrantzia eta herria ospetsu egin duten itsasoko produktuen kalitatea erakutsiz. Aurtengo egitarauak ere hainbat jarduera eskainiko ditu publiko guztientzat. Aipagarrienen artean, arrain-enkanteen simulakroak daude. Horietan, arrantzaleen kofradian egiten ziren ohiko pujak birsortzen dira, eta bertaratutakoei garai bateko lonjetako giroa esperimentatzeko aukera ematen zaie.

Nautika eskolako nabigazio simulagailua ikusteko ikusteko bisitez gain, 6 eta 12 urte bitarteko umeekaz irtera laburrak belaontzietan Bermeoko Portutik edota ‘Izan arrantzale’ tailerra ere egongo da. Horrez gain, umeentzako “Bermeo Tuna Dastaketa: Tunido desberdinak ezagutzen ekimena ere antolatu da. 

Bisita gidatuak ere izango dira, kontserba-fabriketan eta eskola nautikoan barrena ibilaldiak eginez, itsasoko produktuak egiteko prozesuaren eta sektoreko profesionalen prestakuntzaren ikuspegi zehatza eskainiz, aurten Arrain Azoka Pro enpresen topaketa izango da “Jasangarritasuna lehiakortasuna galdu barik” izenekoa eta ondoren Arroyabe arrain konserba lantegira bisita izango da, doan. 

Eta, jakina, arraina protagonista den egun honetan ia behartuta daude gastronomia-dastatzeak. Hori dela eta, bertako kontserbagileen postuak egongo dira, itsasoko produktuen eskaintza zabala eskainiko dutenak, bisitariei Bermeoko sukaldaritzaren bikaintasuna dastatzeko aukera emanez. Horretarako hainbat gune gastronomikoak egongo dira hiru egunetan zehar.

Bestalde, egitarauan jasota dauden itsas txangoek kostaldea itsasotik ikusteko eta herriak bere ingurune naturalarekin duen harremana ulertzeko aukera ere emango dute. Hegaluze itsasontzian egingo dira irtenaldiak, horien artean Izaro irla ikusteko aukera egongo da.

Gune solidarioa

Aurtengo edizioan ere gune solidario bat izango da atuna marmitakoan edo erreta jateko aukerarekin. Herriko kultur, kirol eta gizarte talde, ikastetxe eta gainerako partaideei esker egingo da ekintza hau. Bertan lortzen den dirua 6-12 urte bitarteko haurrei osasun-tratamenduak egiten laguntzeko erabiliko da.

Pintxo Txapelketaren sari-banaketa

Arrain Azoka Elkarteak Bermeoko gastronomia eta kultura uztartuko dituen ekimen berezia prestatu du: Tabernen arteko eta Lagunarteko pintxo Txapelketak. Modu horretara, herritarrek zein profesionalek izango dute txapelketetan parte hartzeko aukera. Horrela, arrainaren zapore paregabea eta euskararen indarra izango dira protagonista.

11 tabernek hartuko dute parte Tabernen arteko pintxo txapelketan, eta epaimahai profesional batek pintxo guztiak dastatuko ditu eta maiatzaren 16ko finalera igaroko diren hiru onenak hautatuko ditu. Azken borroka gastronomikoa, bai tabernen artekoa eta baita ere lagunartekoa, barikuan, maiatzaren 16an, 18.00etan izango da. Bertan, erabakiko dira zeintzuk diren bi txapelketetako pintxorik onenak.

Hegaluze saria

Azokaren unerik hunkigarrienetako bat Hegaluze saria da, Bermeoko itsas ondarea sustatzen eta kontserbatzen nabarmen lagundu duten pertsona edo erakundeak saritzen dituena. Hautagaitzak aurkezteko epea igandean amaitu zen, eta epaimahai batek erabakiko du zein izango den irabazlea. Ekitaldia maiatzaren 16an izango da, 12.00etan, Lamerako karpa handian.

Arrain Azokaren programazioa eskuragarri dago Bizi Bermeo webgunean.