Hondakinen bilketari buruzko kanpaina berria Lea Artibain

Iaz egindako diagnostikoarekin eta Lea Artibaiko hondakinen % 42,10 errefus-frakzioa dela jakinda, Mankomunitateak Hauxera markie! Bereizi eta irabazi kontzientziazio-kanpaina jarri du abian, “herritarrei hondakinen bilketaren egungo egoera azaltzeko eta gure materialak erabiltzeko eta birziklatzeko ohiturei buruzko gogoeta egitera animatzeko helburuarekin”.

Leire Markuerkiaga Mankomunitateko lehendakariak kanpaina berriaren aurkezpenean azaldu zuenez, “hondakinen bilketaren analisiak erakutsi digu Lea-Artibain hobetzeko urratsak eman behar direla: gaur egun, zuzendutako hondakinen %56 errefus-edukiontzian biltzen dira, eta kopuru hori Europako helburuetatik urrun dago, errefus-kopurua % 46ra murriztu behar baitugu epe laburrean”.

Bestalde, arlo ekonomikoan azaldu zuenez, “aurrekontuaren %60 edukiontzi griseko hondakinak erretzeko erabiltzen da, horretaz gain ingurumena kaltetuz. Eta orain, Europak aginduta, norbanakoek hondakinen kudeaketaren kostu osoaren ardura hartu behar dute, beraz, tasak igo edo jaitsi egingo dira herritarren berrerabilpen eta birziklapen ohituren arabera, eta jendea horretaz konturatzea nahi dugu“ gaineratu zuen.

Datu horiek kontuan hartuta, Mankomunitateak kontzientziazio-kanpaina hau jarri du martxan. eta hiru kanal erabiliko dituzte mezua helarazteko. Alde batetik, webgune bat sortu da kanpainaren helburuei, agendari eta beste datu interesgarri batzuei buruzko informazioarekin. Bestalde, sare sozialetarako birziklapenari buruz kontzientziatzeko edukiak sortuko dira. Hirugarrena 2025eko lehen seihilekoan herriz herri eta ikastetxez ikastetxe ibiliko diren antzerki ikuskizunak izango dira, modu entretenigarri, pedagogiko eta dibertigarrian, “umorearen bidez mezuak errazago iristen direla uste dugulako” azaldu zuten.