Musika Eskolako teilatua eraberritzeko lizitazio prozesua ireki du Durangok

Durangoko Udalak 870.551,50 euroko aurrekontua bideratuko du, BEZik gabe, Musika Eskolako teilatua eraberritzeko. Aste honetan abiarazi egin du proiektua, lizitazio prozesua irekiz. Proiektua gauzatzeko epea 8 hilabetekoa izango da, kontratua sinatzen denetik kontatzen hasita, eta proposamenak uztailaren 5era arte aurkeztu ahal izango dira, Durangoko Udalaren Kontratatzailearen Profilaren bidez.

DEkimen garrantzitsu honek, eraikinaren baldintza estrukturalak eta estetikoak hobetzeaz gain, energetikoki jasangarriak eta eraginkorrak diren konponbideak ezarri nahi ditu. Kontratua prozedura ireki baten bidez esleituko da, eta egungo estalkia osorik ordeztea aurreikusten du, euskarria eta zurezko egitura barne. Iragazgaizte eta isolamendu termikoko sistema aurreratuak jarriko dira, establezimenduaren barruan iraunkortasuna eta erosotasuna bermatzeko. Horrez gain, sabai faltsuak berrituko dira lehen solairuan, eta dagokion argiztapena eguneratuko da, espazioaren funtzionaltasuna eta eraginkortasuna hobetzeko.

Proiektuaren alderdi nabarmenetako bat plaka fotovoltaikoak jartzea da. Plaka horiek eraikinaren energia-beharren zati handi bat beteko dute, eta udalerriaren iraunkortasun-politikekin bat egingo dute. Eraikinaren segurtasun eta irisgarritasun-baldintzak ere hobetuko dira, beheko solairuan bi bao handituz. Horrek ebakuazio eraginkorragoa erraztuko du eta kontzertu-aretoa modu independentean erabiltzea ahalbidetuko du.

Saibigaingo 10. eraikina, Euskaltegiaren egungo kokalekua, Bartolomé Ertzilla Musika eta Kontserbatorioaren behin-behineko egoitza izango da, "behin-behinekoa eta koiunturala", obrei ekiteko beharrezkoa baita Montevideo kalean dagoen eraikina hutsik egotea. Erabiltzaileei pazientzia eskatzen die Udalak behin-behineko lekualdaketak sor ditzakeen eragozpenengatik; "guztion onerako izango da eraberritzea".

Mireia Elkoroiribek obraren premiazko beharra nabarmendu du: "teilatuak hainbat akats ditu, eta horiek nabarmen eragiten diote Musika Eskolaren barrualdeari, haren funtzionamenduak eragina baitu. Guretzat, estrategikoa da kultura, arte eta hezkuntza-gune hau berritzea, familientzako kalitatezko zerbitzua bermatuz eta udalerriko ondare historikoa zainduz".