Zornotzako historia islatu da ‘11 emakume, 11 istorio’ dokumental estreinaldian

Joan den larunbatean, Emakumeenganako Indarkeriaren aurkako Nazioarteko Egunean, Amorebieta-Etxanok urrats garrantzitsua eman zuen historia eta emakumeen paper komunitatean ikusarazteko bidean, 11 emakume, 11 istorio dokumentalaren estreinaldiarekin. “Herriko emakumeek egin duten lana aldarrikatzera gatoz gaur. Helburu horrekin itxi ditugu Udalak duela urtebete abian jarritako hainbat ekitaldi. Asko aurreratu dugu emakumeen eskubideen defentsan azken hamarkadetan, baina hori ez da kasualitatea izan. Kolektiboki, mobilizazio feministari esker izan da. Baina baita emakume bakoitzak egindako urrats txikiei esker ere, etxean, lanean, auzoan eta baita herrian ere. Eta hori guztia belaunaldi berriei transmititzea garrantzitsua da”, azpimarratu zuen Ainhoa Salterain alkateak.

Ekitaldia Zornotza Aretoan burutu zen eta dozenaka herritar elkartu ziren bertan. Herriko historian emakumeek egindako lana goraipatu eta aldarrikatzearen garrantzia azpimarratuz, dokumentala proiektatu ondoren, mahai-inguru bat egin zen. Besteak beste, lanbide-munduan sartzeko gainditu behar izan zituzten oztopoak azaldu ziren, eta aukera berrien bila beste leku batzuetatik iritsi ziren emakumeen esperientziak ere jorratu ziren.