'Eztabaidak literaturarekin XXI. mendean' zikloa Bidebarrietara itzuliko da asteartean

Datorren asteartean, otsailaren 17an, 'Eztabaidak literaturarekin XXI. mendean' izeneko zikloa itzuliko da Bidebarrieta Kulturgunera, 'Sortu, idatzi eta abar' izeneko hitzaldi berezi batekin. Bertan parte hartuko dute Bernardo Atxaga eta Unai Elorriaga idazleek, eta Ilaski Serrano Urkidi kazetaria egongo da moderatzaile gisa. Ekitaldia 19:00etan hasiko da, eta sarrera doakoa izango da leku guztiak bete arte. Joan ezin izatekotan, streaming bidez eskainiko da baita ere.

Bi egileek euskal literaturari buruz hitz egingo dute, biek lagundu baitute nazioartean ezagutarazten. Solasaldian beren lanen sortze prozesuaz ere hitz egingo dute, zertan inspiratzen diren, idazten hasteko eta jarraitzeko dituzten motibazioak, zertarako eta norentzat sortzen duten, zer den beraientzat idaztea, eta literatur ibilbidean beraien obrak izan dituzten bilakaeraz, besteak beste.

Parte-hartzaileei buruz

Bernardo Atxaga garai guztietako euskal literaturako pertsonaiarik nabarmenetakoa da. Nazioartean ezagunena eta irakurriena den euskal idazleak 32 hizkuntza baino gehiagotara itzuli da bere lana. Bere libururik unibertsalena, "Obabakoak", 1988an argitaratua, unibertso propio bat sortzeko balio izan du eta euskal literatura modernizatu eta globalizatzeko gakoetako bat bihurtu zen.

Eleberria, poesia, haur-literatura... hainbat generotan aritu da bere ibilbide literario luzean. Euskaltzaindiko kidea, euskal idazlerik sarituena da (Letren Sari Nazionala, Euskadi Literatura Saria, Cesare Pavese Poesia Saria, Arte Eszenikoen Max Saria, Liber 2021 Saria...), eta egungo euskal literatura ulertzeko ezinbesteko egilea.

Filologoa, irakaslea, itzultzailea, Unai Elorriaga da gaur egungo euskal literaturako beste ahots garrantzitsuenetako bat. Bere eleberri ezagun eta sarituez gain, haur literatura, saiakerak, antzerkia eta komikiak idatzi ditu. Bere lana euskaraz sortu da eta hainbat hizkuntzatan irakur daiteke.

Elorriagak bere literatur ibilbidearen hasieratik sari garrantzitsuak irabazi ditu, hala nola 2002ko Narratibako Sari Nazionala "SPrako Tranbia" bere lehen eleberriarekin. Jaso duen azken saria da Euskadi Literatura Saria "Francesco Pasqualeren bosgarren arima" eleberriagatik. Algortako idazlea egungo euskal literaturako ahots berezienetakotzat jotzen da, eraiki duen mundu literario berezi eta konplexuari esker.

Ilaski Serrano Urkidi kazetari, lokutore eta aurkezlea da. Irrati- eta telebista-saio ugaritan lan egin du – musikalak, haurrentzakoak, entretenimendukoak, elkarrizketetakoak, kulturalak... –, besteak beste, Mihiluze lehiaketan (ETB1), pantaila txikiko pertsonaia ezagun bihurtu duena.