Artatse ikastetxeko kanpoko arotzeria konponduko du Bilbok
Udalak 619.000 euro baino gehiago inbertitu ditu Otxarkoagako ikastetxeko energia-efizientzia eta erosotasuna hobetzeko
Bilboko Udalak kalitatezko ikastetxe publikoen sare bat finkatzeko udal-estrategiaren barruan kokatutako jarduera berri bat jarriko du martxan. Guztira 619.396 euroko aurrekontua inbertituko du, BEZa barne, Otxarkoaga auzoan kokatutako Artatse HLHIko kanpoko arotzeria erabat konpontzeko.
Hezkuntza Sailak ikuspegi argi batekin lan egiten du: hezkuntza-espazioak ikaskuntza-prozesuaren funtsezko zati bat dira. Ikasgela erosoak, eraikin energetikoki efizienteak eta ingurune seguru eta osasungarriak izateak asko laguntzen du errendimendu akademikoan, ikasleen ongizate emozionalean eta eskola-bizikidetzaren kalitatean.
"Gure ikastetxeak orainaldian eta etorkizunean hezteko prestatuta dauden espazioak izan daitezen nahi dugu, eta horretarako, etengabe inbertitu behar da hobekuntzan, betiere hezkuntza-komunitateen eskutik", adierazi du Eider Bilbao Hezkuntzako zinegotzi ordezkariak.
Artatse HLHIko esku-hartzearen helburu nagusia eraikinaren energia-efizientzia eta ikastetxearen konfort termikoa eta akustikoa hobetzea izan da. Obrak bost hilabeteko epean egin dira, eta goiko eraikinaren kanpoko arotzeria aldatu da. Eraikin horrek 1985ean egindako jatorrizko itxiturak gordetzen zituen oraindik.
Obra horri esker energia-galerak nabarmen murriztu dira, hotzaren eta zarataren aurkako isolamendua hobetu da eta eguneroko hezkuntza-jarduera garatzeko baldintza egokiagoak sortu dira. Gainera, bat dator energia-kontsumoa murrizteko eta eraikin publikoetan ingurumen-jasangarritasuna hobetzeko udal-helburuekin.
Artatse HLHIko inbertsioa Hezkuntza Sailak bultzatutako jardueren parte da, eta lehentasun argia du: ikastetxeei entzutea, hezkuntza-komunitatearekin jarduketak adostea eta eskola publiko inklusiboago eta modernoago baterantz aurrera egitea.