Segurtasun-pertzepzioa murriztu egin da Bilboko barruti guztietan

Bilboko Udalak 2024ko Bilboko Segurtasunaren Pertzepzioaren eta Biktimizazioaren gaineko Azterlanaren ondorioak ezagutzera eman ditu. Txosten horrek Bilboko Segurtasunaren aldeko lehen Itunean jasotako konpromisoetako bati erantzuten dio. Ituna Udalean ordezkaritza zuten alderdi politiko guztiek sinatu zuten 2018ko martxoan. Iazko uztailean ituna luzatu zenean, neurri hau berriro ezarri zen.

Ituna sinatutakoan, azpimarratu behar da galdetegian aldaketak egin direla eta galdera batzuk eguneratu direla, inkestaren emaitzak itun berriaren neurri eta helburu berrietara egokitzeko.

Inkesta hau egitearen arrazoia izan zen Bilboko bizilagunei paper garrantzitsu bat ematea Herritarren Segurtasuneko politiketan, zenbait printzipiotan oinarrituta: duintasuna eta berdintasuna gizartearen eremu guztietan, gardentasuna, delituen prebentzioa hobetzea, eta legez kontrako edozein egintzaren aurreko irmotasuna.

Horretarako, Segurtasunaren aldeko Itunaren barruan ere, abian jarri dira hainbat tresna, hala nola Auzo Polizia, auzoetako tailerrak, Biktimei Laguntzeko Ikuskaritza... Azken batean, gizarte kohesionatu batetik ateratzen den segurtasun integralaren kontzeptu bat ezartzea da kontua.

5.731 inkesta

IKERFEL enpresak egin du azterlana. Dokumentu demoskopikoak hiriko barruti guztietan bizi diren eta 16 urte baino gehiago dituzten 5.731 pertsonako lagin bat aztertu du. Landa-lana, bestalde, telefonozko elkarrizketen bidez egin da, 2024ko ekainetik abendura bitartean.

Azterlanetik ondorioztatzen da hirian herritarren segurtasunaren gaineko pertzepzioa hamarretik 5,73 dela. Gaueko pertzepzioaz hitz egiten denean, nota hori 5,88ra igotzen da.

Barrutien arabera, segurtasun-pertzepzioak balio hauek ditu:

• Deustu: 6,02
• Uribarri: 5,77
• Otxarkoaga-Txurdinaga: 5,76
• Begoña: 5,72
• Ibaiondo: 5,65
• Abando: 5,72
• Errekalde: 5,52
• Basurtu-Zorrotza: 5,72

Galdetu zaien pertsonen % 77,7k uste du Bilbon beste hiri batzuetan baino delinkuentzia-maila txikiagoa edo berdina dagoela.

Oro har galdetzen denean, herritarren % 40,9ren eskaera nagusietako bat "delinkuentzia txikiagoa eta herritarren segurtasun handiagoa" da. Hala ere, zuzenean beren etxeko eskaera edo premia nagusiei buruz galdetzen zaienean, ehuneko hori % 9,7ra jaisten da –lehen aipamena da– edo % 16,9ra –aipatzen da, baina ez lehenengo posizioan–.

Agerian geratzen da, halaber, delitu ohikoena –hala burutua nola saiakera graduan– aurrez aurrekoa ez den iruzurra dela, batez ere online edo telefonoz. Galdetutako pertsonen % 59,6k aitortu du iruzurra jasan duela.

Ehuneko hori nabarmen murrizten da aurrez aurreko delitu-egitateen kasuan. Hala, eta adibide batzuk aipatzearren, % 90,8k aitortu du ez duela ebasketarik jasan –hala burutua nola saiakera graduan–; % 97,3k ez du indarkeriaz edo larderiaz egindako lapurretarik jasan; eta % 96,8k ez du sexu izaerako mehatxu edo erasorik jasan.

Nabarmen bat Bilboko Udaltzaingoarentzat

Bilboko Segurtasunaren Pertzepzioari eta Biktimizazioari buruzko Azterlanak ematen dituen datuen arabera, herritarren % 30,5ak adierazi du Udaltzaingora jo izan duela azken urtean. Jasotako tratua dela-eta, herritarrek 10etik 7,10eko kalifikazioa ematen diote agenteekiko harremanean jasotako tratuari.

Era berean, Udaltzaingoak ematen dituen polizia-zerbitzuen balorazioa nabarmenaren inguruan dabil, 6,65, eta inkesta egin zaienen artean % 84,5ak dio Udaltzaingoaren eraginkortasuna azken urteetan hobetu edo mantendu dela.

Inkestatutako pertsonen % 34,5ek ez du Bilboko Udaltzaingoaren alderdi negatiborik aipatu.