'Sail in Festival' belaren kulturari buruzko jaialdia ospatuko da irailean

BILBO. 'Sail in Festival' belaren kulturaren jaialdia da, eta helburua belaz nabigatzearen artea sustatzea eta zabaltzea da. "Belaz nabigatzea kirola baino gehiago da. Jendea emozionatu, hezi, inspiratu eta konektatu nahi dugu, belak transmititzen dituen balio sendoak baliatuz", azaldu dute antolatzaileek.

Bigarren edizioaren kartela Gilles Martin-Raget argazkilariaren lanari dedikatua dago. Bela munduaren argazkilaririk ezagunenetako eta emankorrenetako bat da Martin-Raget. Irudia "oso iradokitzailea" da: XX. mendearen hasierako belaontzi baten irudia da, XXI. mendeko itsasoetan barrena nabigatzen.

Horrela, jaialdian "aukera paregabea" izango da belaren modalitate guztiei buruzko dokumental, film eta film labur onenen sorta bat ikusteko, eta istorioen protagonistekin egoteko eta nabigatzaile mitikoekin, estropadalari handiekin eta itsasoan zehar dabiltzan abenturazaleekin hitz egiteko aukera ere eskainiko du. Horretarako, 15 gonbidatu ospetsu izango dira Bilbon.

Guztira, zazpi saio antolatu dira irailaren 3tik 6ra bitartean, BBK Aretoan: Amerika Kopa estropada mitikoenaren inguruko saio berezia; Mini Transat estropadari buruzko saio berezia; poloen inguruetako nabigazioak eta abenturak; belaontzi klasikoei buruzko istorioak; munduari bira, bakarrik, bizitzeko modukoa ez den katamaran batean; Ronaren Ibilbidearen estropadako istorioak eta beraien protagonistak; eta mundu biraren errekorraren abentura, Julio Verne sariarekin.

IKASTARO MAGISTRALAK

Aurtengo nobedadea da bi ikastaro magistral (Sail in Class) prestatu direla, nazioartean ospe handia daukaten profesionalek emango dituztenak. Doako ikastaro hauek asteburuan zehar izango dira Bilboko Itsasadarra Itsas Museoaren instalazioetan.

Jaialdia irailaren 3an hasiko da, belaren mitoa izan zen Sir Peter Blake zeelandaberritarrari omenaldia eginez; 2001. urtean hil zuten Peter Blake. Haren senitartekoak izango dira Bilbon: Pippa emaztea eta James semea, baita Zeelanda Berriko kulturaren eta belaren ordezkariak ere. Gainera, Europan modu esklusiboan aurkeztuko da "Blakey" filma, Sir Peter Blakeren bizitza eta ibilbidea azaltzen dituena.

Proiekzioak (Sail in Films), hitzaldiak (Sail in Talks) eta ikastaroak (Sail in Class) ez ezik, Sail in Festival jaialdiak belaren munduaren inguruko zenbait argazki erakusketa eskainiko ditu (Sail in Expo): Mirabaud Yacht Racing Image lehiaketa famatuaren 2014ko edizioko argazkirik onenak; Gilles Martin-Raget argazkilariaren ibilbidearen inguruko atzera begirako erakusketa esklusiboa; eta Sir Peter Blake eta belaren munduan izan zuen ibilbideari buruzko erakusketa esklusiboa, Blake familiaren eta Sir Peter Blake Trust fundazioaren laguntzarekin prestatua.