Nabarnizko Udalak 138.000 euroko (BEZa barne) lizitaziora atera ditu udalerriko aire libreko parke publiko nagusien berrikuntza integralerako obrak: Udaletxe, Elexalde, Ikazurieta, Uribarri, Uribarri San Miguel eta Zabaleta. Helburua da parke horien erabiltzaileen segurtasuna, irisgarritasuna eta ongizatea bermatzea.
Proiektu honen bidez urbanizazio lanak egingo dira (zolatzea, itzalpeko zuhaitzak, iturriak, zoladura teknikoa, haur eta osasun-jolasak, hiri-altzariak) herriko aisialdirako sei gune nagusietan, indarrean dauden segurtasun eta irisgarritasun araudietara egokituta, lizitazioaren oinarrietan jasotzen denez.
Hain zuzen, oraingo jolasak ordezkatuko dira segurtasun araudia beteko duten eta haurren jarduera fisikoa, kognitiboa eta soziala sustatuko duten jolas berriekin; aisialdirako guneetako zoladurak ere berrituko dira, haurrek segurtasunez jolastu ahal izateko inpaktuak xurgatzen dituzten material bigunak erabilita, hala nola kautxuzko zoladura; eta hiri-altzariak (bankuak, paperontziak eta abar) berrituko dira, pertsona guztientzako erosotasuna eta irisgarritasuna bermatuz, mugikortasun urriko pertsonak barne.
Era berean, parke guztiak desgaitasuna duten pertsonentzat irisgarriak izan daitezen, arrapalak eta gurpil-aulkiak nahiz haurtxoen kotxeak ibiltzeko egokiak diren gainazalak ezarriko dira.
Jolasei dagokienez, jolas moderno eta seguruak instalatuko dira, hala nola kulunkak, toboganak eta eremu interaktiboak, haurren garapen fisiko eta soziala sustatzeko. Jolasak erabiltzaileen adinaren arabera hautatuko dira, segurtasunari eta iraunkortasunari arreta berezia eskainiz.
Bestalde, gaur egungo zoladura kalitate eta iraunkortasun handiko materialekin ordezkatuko da, adibidez kautxuzko zoladura edo antzekoa, inpaktuak behar bezala xurgatzeko eta istripuen arriskua murrizteko. Zoladura, gainera, erraz mantentzeko eta garbitzeko moduan jarriko da.
Banku eta paperontzi sendo eta ergonomikoak jarriko dira, birziklagarriak eta kanpoaldean erabiltzeko egokiak diren materialekin eginda. Itzalpeko elementuak ere gehituko dira, tartean Foru Errepideko marra zuritik 12 metro baino gehiagora kokatuko den markesina bat, urte osoan espazio erosoa bermatzeko. Halaber, postontziak lekuz aldatuko dira, errepidearekiko segurtasun-distantziak errespetatuta.
