Bilboko kultur programazioak hainbat jardueraz beteko ditu hiriko auzoak irailean eta urrian

Aste Nagusi bete eta biziaren ostean, Udalak eskaintza kultural zabala mantenduko du, hainbat diziplinetara gerturatuko duten programen bidez: zirku garaikidea, kaleko arte eszenikoak, musika, arte plastiko eta bisualak, literatura, ondarea eta folklorea. Guztientzat pentsatutako programazio anitza, irekia eta plurala izango da.

Horrela, hurrengo egunetan programa hauek hasiko dira edo jarraituko dute:

ESZENA KALERA - Irailaren 1etik 30era

Euskadiko kaleko arteen zirkuiturik handiena da eta irailean zehar garatuko da. Bere egitarauan hainbat diziplinatako ikuskizunak biltzen ditu, hala nola zirkua, dantza, magia, kale-antzerkia edo txotxongiloak. Edizio honetan 16 antzerki-konpainiak hartuko dute parte eta guztira 31 emanaldi eskainiko dituzte Bilboko 27 auzotan.

EXPODISTRITO - Irailaren 1etik aurrera

Aldi baterako erakusketen ziklo honek bertako artisten eta beste kolektibo batzuen erakusketak eskaintzen jarraituko du hainbat auzotako Udalguneetan. Edizio berriak hainbat diziplinatako proposamenak biltzen ditu, hala nola argazkilaritza, pintura eta beste arte plastiko batzuk. Erakusketa guztiak doakoak izango dira eta goizez eta arratsaldez bisitatu ahal izango dira. Erakusketetako batzuek bisita gidatuak izango dituzte, ikusleek ikusgai dauden obren esanahian sakontzeko aukera izan dezaten.

Urteko azken lauhilekorako Akuarelisten Euskal Elkartearen, Musika Bulegoa elkartearen, Euskal Australiar Elkartearen, Las Cuatro Esquinas taldearen eta Marta Calvo Bilbao, Laura González, M'Angel Manovell, Carolina Zuluaga Zuleta eta Mertxe Amondarain artisten erakusketak programatu dira.

DANTZA PLAZETAN - Irailak 7 eta 27; urriak 25

Urte osoan zehar garatzen dena egitarau hau abuztuko etenaldiaren ondoren itzuliko da, irailaren 7an Zumarraga plazan Gaztedi Dantzari Taldearen eskutik erromeria batekin eta 27an beste hiru jarduerarekin: Santiago plazako ohiko erromeria Salbatzaile Dantza Taldearen eskutik, Ondalaneko erraldoien kalejira Sarriko auzoan zehar eta dantza alardea Zorrotzako frontoian Ibai Arte Dantza Taldearen eskutik. Larunbatean, urriak 25, kalejira egingo da Basurtuko kaleetan zehar eta erromeria Santiago Plazan.

ZIRKUALDE - irailaren 18tik 20ra

Zirkualde Euskadin egiten den zirku-arte garaikideen jaialdi bakarra da. Publiko guztiari zuzenduriko sei konpainiaren ikuskizunak izango ditu eta agertoki nagusia Errekalde Plaza izango da. Era berean, Zirkualde programaren baitan, Dantza bertikalaren III. Topaketa egingo da irailaren 18an El Fango kiroldegian. Bertan, aireko dantzaren modalitate honetako bi erakusketa egongo dira zabalik.

PLAZARIK PLAZA - irailaren 25etik 27ra

Beti Jai Alai Dantza Taldearekin elkarlanean antolatu da eta. Basurtu auzoko kaleak kalejiraz, dantza-alardez eta beste hainbat emanaldiz beteko ditu, herritarrek doan goza dezaten.

Bilboko Antzerki eta Dantza Garaikidearen Jaialdia - BAD - urriaren 16tik 26ra

Bilboko Antzerki eta Dantza Garaikidearen Jaialdia urrian itzuliko da bere 27. edizioarekin; horaingo honetan 17 konpainiaren eskutik. Arte eszeniko abangoardisten, berritzaileen eta askotarikoen inguruko topaketa da honakoa eta Euskadiko, Estatuko eta nazioarteko konpainien partaidetza du (aurten zortzi, sei eta hiru dira, hurrenez hurren). Antzezlanek diziplina anitzak jorratzen dituzte, hala nola dantza/performancea, dramaturgia berriak edo antzerkia, eta oraingo honetan publikoak bi estreinaldi absolutu, Euskadiko lau estreinaldi eta Estatuko bi estreinaldi dastatzeko aukera izango du.

ANTZERKIAREN SUSTAPENA

BILBOKO ZIRKUITUA - urritik abendura

Bizkaiko hiriburuko eta inguruetako antzerki talde amateur eta erdi-profesionalen jarduera sustatzen duen udal ekimena da, publikoari bere proposamenen doako emanaldiekin antzerki zirkuitu batez gozatzeko aukera eskainiz. Guztira 12 emanaldi izango dira, obra klasikoak, egokitzapenak edo antzerki laburreko saioak barne.

Gainera, Bilboko Udaleko Antzerki Baliabideen Zentroa den Bilbao Eszenak irailaren 12an, ostirala, irekiko du izena emateko epea, gazteak, haurrak eta helduak antzerkian hastera bideratutako urteko ikastaroetan.

Horrez gain, Bilbo Eskotatik Antzerkira programa didaktikoak antzerki eta dantza emanaldiak eskainiko ditu urrian eta azaroan, ikastetxeetako ikasleei zuzenduta. Aurtengo programazioaren ardatza "Antzerkia: espero duzuna baino gehiago" da.

LITERATUR JARDUERAK

Irailean, halaber, Bidebarrieta Kulturguneak bere ohiko jarduerari ekingo dio, besteak beste, literatur aurkezpenekin eta hilabeteroko hitzorduekin: Literaturarekin Elkarrizketak, Aktualitatearekin Topaketak eta Bidebarrieta Zientifikoa. Irailaren 10ean, asteazkena, emango zaio hasiera udazkeneko programazioari, "Morir en la arena" Leonardo Padura kubatar idazlearen azken eleberriaren aurkezpenarekin.

Hilabetea amaitzeko, urtero bezala, Bilboko Udalak Miguel de Unamunori omenaldia egingo dio irailaren 29an, astelehena, bilbotar idazle ospetsuaren jaiotzaren egunean, lore eskaintza batekin. Gainera, Bidebarrieta Kulturguneak hainbat jarduera hartuko ditu.

Urrian, La Cámara del Libro de Euskadiko Liburu Ganbarak antolatutako Liburu Zahar eta Aukerako Azokaren edizio berri bat egingo da Areatzan. Best-seller-etatik haratago, irakurzaletasuna sustatu nahi duen literaturarekin hitzordua.

Era berean, urriaren 13an, Bilboko Udalak omenaldia egingo dio Gabriel Aresti idazle euskaldunari bere izena daraman Ipuin Lehiaketaren Sarien banaketan. Hilabete berean Angela Figuera poeta bilbotarra ere omenduko dute lore eskaintza batekin.

BILBAO IZAN

BILBAO IZAN programak hiriko ondare historikoa gogoratu eta zabaltzeko ekimenekin jarraituko du. Horrela, irailetik aurrera "Txio ta Txio" bideoen edizio berri bat itzuliko da, oraingo honetan Bilboko eskoletan eta duela ia mende bat baino gehiagoko hezkuntzan oinarritua. Era berean, urrian hasiko da ARGAZKINETA proiektuaren zazpigarren edizioa. Oraingo honetan, San Adrian auzoa izango da ardatz eta horren bidez, Bilboko auzoei buruzko oroitzapenak, testigantzak eta material dokumentala bilduko dira, herritarren parte-hartzearen eta inplikazioaren bidez.

Programa bakoitzari buruzko informazio zehatza laster jakinaraziko da.