Barakaldok arrazakeriaren aurka lan egiten du atzerritar jatorriko pertsonen integrazioa errazteko. Aniztasunaren Eskolak 2023/2024 ikasturteko programazioari amaiera emango dio datorren asteartean, martxoak 26, 18:30ean, Barakaldo Antzokian, "Yo no soy racista pero manzanas traigo" antzezlanarekin, Aitor Vinagret aktore eta komikoaren eskutik. Inori ez zaio ihes egiten arraza aniztasuna gero eta ageriago dagoela Barakaldon. Horretarako, erabakigarria izan da barakaldarren % 12,9 atzerritarrak izatea, udalerriko azken immigrazio-panoramikako datuen arabera (2022ko datuak).
Carlos Fernández bigarren alkateordeak eta Monica Álvarez Gizarte Kohesioko eta Aniztasunaren Kudeaketako zinegotziak aukera aprobetxatu dute berdintasuna, tolerantzia, errespetua eta bakean oinarritutako bizikidetza mezua zabaltzeko. "Arrazakeriaren aurkako borroka sendotu egin da azken hamarkadetan, baina tamalez ezin dugu esan gaitz hori desagerrarazi denik. Aurrerapauso nabarmenak lortu ditugu, baina arrazakeria eta intolerantzia oraindik ere modu tamalgarrian agertzen dira gure gizartean ", adierazi du Fernandezek.
Gizarte Kohesioaren eta Aniztasunaren Kudeaketaren arloa Barakaldoko Kulturarteko III. Plana egiteko prozesuan murgilduta dago gaur egun. Plan horrek zehaztuko du datozen urteetarako norabidea. "Gaur egun atzerritar jatorriko pertsonei eskaintzen dizkiegun zerbitzuak hobetu nahi ditugu, haien integrazioa errazteko, eta, aldi berean, Barakaldoko herritar guztien artean kulturen arteko bizikidetza sustatzen dugu", adierazi du Carlos Fernándezek. "Beti ahalegindu gara migratzaileak gure gizartean integratzen, haien jatorria, kultura, erlijioa edo sinesmenak errespetatuz", gaineratu du.
Bestalde, Monica Alvarezek nabarmendu du Barakaldo izan zela Immigrazio Plan bat martxan jarri zuen lehen udalerria. Gainera, Udal Zerbitzu bat du, etorkinei informazioa eta orientazioa ematen diena udal-zerbitzuen funtzionamenduari buruz, gizarte-zerbitzuei buruz, seme-alaben hezkuntzari eta eskolatzeari buruz, atzerritarrei buruzko legeari buruz, hizkuntza ikasteko lekuei buruz.
