Kanye West abeslariak Bianca Censori emaztearen gorputz biluzia erakutsi dio munduari Grammy-etako alfonbran. West sarritan ibiltzen da han eta hemen bere emaztearen gorputza erakutsiz, eta esaten dut gizonak erakusten duela emakumearen gorputza, eta ez emakumeak berak, zeren sentsazio hori ematen du irudiak ikusita: nik ikusten dut munduaren aurrean berea den emakume baten gorputza harro erakusten ari den gizon bat. Eta begi gehienek Censoriren bularrei, hankarteari eta ipurmasail biluziei begiratzen dieten bitartean, nik emakumearen begiei begiratzen diet eta benetan ikusten dut biluzik, ez bakarrik fisikoki, biluzik bere balio guztia beren sexu-erakargarritasunari lotzen duen gizarte baten aurrean. Irudiak min ematen dit eta min hori ezaguna zait, askotan sentitzen dudalako sareetan hiper-sexualizatutako hainbat emakume gazte ikusten ditudanean. Gizarte honek euren kapital sexualari ematen dion balioaz jabetuta, beraien arrakasta soziala sexualki erakargarri izateko duten ahalmenean datzala ikasi dute.
Aste honetan, “Emakumeek ingurune digital berrietan duten irudiaren autopertzepzioa” (Emakumeen Institutua) ikerketa argitaratu da, eta haren ondorioek zaurian sakontzen dute. Neska gazteen ia % 75ak eragiketa estetikoei buruzko iragarkien esposizio oso handia jasaten du; nesken % 72k bere fisikoari buruzko iruzkinak edo nahi ez dituen eduki sexuala duten mezuak jasotzen ditu; eta % 60k gutxiespenak, erasoak edo irainak jasan ditu iruzkin matxisten bidez. Emakumeek etengabeko presioa jasaten dute edertasun-ideal eskuraezin bat lortzeko eta ingurune digitaletan bereziki da bortitza eraso hau. Azterlanak ere ohartarazten gaitu: emakumeen irudiaren sexualizazioa eta merkantilizazioa askotan lotzen da emakumeen ustezko ahalduntzeaz. Ahalduntze faltsu bat, matxismoak eta kapitalismoak euren buruei egindako lifting operazio bat, mezu argi bat indartzen jarraitzeko: emakumeen boterea hor datzala bakarrik, gure haragiaren erakargarritasunean; gure kapital sexualean.
