'Albo batera utziz' izenekoa

BilbaoArtek Irati Urrestarazuren lan berria hartuko du

17.10.2020 | 04:00
'Albo batera utziz' izeneko obra BilbaoArten egongo da ikusgai.

BILBO. Atzotik hasita, urriak 16, eta azaroaren 20ra arte, Irati Urrestarazuren 'Albo batera utziz' izeneko obra berria egongo da ikusgai BilbaoArte Fundazioan. Epe horretan zehar, astelehenetik ostiralera arratsaldez ikusi ahal izango da artista altsasuarraren lana.

Horia nagusi den eskulturaren eta instalazioaren erakusketak zentroaren aurtengo banakako erakusketen egutegia ixten du. Zentroan 2019an bekaduna izan zen Irati, beste zazpi artistarekin batera aukeratu zuten Urazurrutia Aretoan bakarka erakusteko.

'Albo batera utziz' erakusketak azken hilabeteetan erakusketa honetarako landu den moduari egiten dio erreferentzia. Artistak azaldu duenez, "Erretxina tolestean tentsio horiek bilatzen nituen, non, dirudienez, hautsi egingo den, baina erabat behartu gabe"; puntu horretan, alde batera uzten zituen, beren forma modu naturalean har zezaten. Urrestarazuk bere buruari eusteko gai diren eskulturak egiteko euskarriak eta egiturak baztertu ditu horrela: "Nik nahi nuenaren eta piezek nahi zutenaren arteko artikulazioa".

Erakusketa honetan, Iratik testurak eta gardenkiak azpimarratzen ditu – Obra olana hori handi batek bitan banatzen du gela –, baita piezen artean iradokitzen diren harreman sentigarri eta materikoak ere. Olanak, aretoa moztu eta alde bakoitzeko piezen ikuspegia baldintzatzen duen ardatz gisa, erretxina gardenezko piezak eusten ditu. Pieza eskultorikoen multzoak, nagusiki poliesterrezko erretxinekin eta akrilikoekin landuak, hormetan edo zoru mailan bermatuta daude.

Kolore nagusi bakarra erabiltzea da Irati Urrestarazuren lanaren ohiko ezaugarrietako bat, sortzeko gai den tentsio eta konexioengatik. Tonu argiak eta hori distiratsu bat dira protagonista pieza gisa eratzen den erakusketa sotil honetan.

'Albo batera utziz' erakusketa eta harekin batera doan katalogoa gauzatzean, Iratik Javier Arbizu (muntaketan eta katalogoan) eta Oihane Iraguen (testuan) estudio-kideen papera nabarmentzen du. Sotiltasuna da artistak gehien nabarmentzen duen ezaugarria instalazioa bisitatzerakoan eta katalogoa irakurtzeko orduan; izan ere, funtsezko tresna da obraz gozatzeko, honetan erakusketa nola ikusten duen irakurlearekin partekatzen saiatzen bait da Urrestarazu.

ARTISTARI BURUZ

Irati Urrestarazu (Altsasua, 1989) Okela Sormen Lantegiaren sortzailea da, eta erakusketen komisarioa izan da 2014tik gaur arte. 2013tik hainbat erakusketa kolektibotan parte hartu du eta banakako bat egin du Rekalde aretoko Kabinete Abstraktuan (2019). Bizkaiko Foru Aldundiaren Ekoizpen Beka (2017-2018), Eusko Jaurlaritzaren Sormen modalitateko diru-laguntza (2019) eta Nafarroako Gobernuaren ekoizpenerako diru-laguntza (2020) jaso ditu. BilbaoArte egoitza egin du (2019). Nafarroako "Encuentros" Artista Gazteen lehen saria jaso zuen.