Getxoko kultur etxea

Komisario talde berriak zuzenduko du Getxoarte

Azken bost urteetan Eduardo Hurtado izan da komisarioa

09.02.2020 | 04:08
Una de las artistas participantes en una edición anterior de Getxoarte.

Azken bost urteetan Eduardo Hurtado izan da komisarioa

BILBO. Getxoartek antolatzen dituen ekimenak zuzenduko ditu komisario talde berriak aurrerantzean. Lana hau egiten zuen Eduardo Hurtadok azken bost urteetan.  Aldaketa honi esker, "ikuspegi eta ahots anitz" izango ditu Getxoartek, arduradunek jakinarazi dutenez. Pasa den urtean bezala, ikusgai izango da  abenduaren 13tik 15era Romo Kultur Etxean.

Horrela, Getxoko Kultur Etxetik jakinarazi dutenez, Julia  Morandeira eta Isabel de Naveran ikertzaile getxoztarrak programa  eszenikoaz arduratuko dira, publikoari proiektu garaikide  eszeniko-performatiboak gerturatzea helburu duen ekimena, hain zuzen  ere.

Morandeira Madrilgo Maiatzaren Biko Arte Zentroaren La Escuelita  ikerkuntza laborategiko zuzendarikidea da, eta Teatros del Canal  zentroetako zenbait ekimen zuzentzen ditu. De Naveran arte eszenikoen  ikerkuntzan aritu da azken urteetan; 2016tik 2018ra "Elipsiak" dantza zikloaren komisarioa izan zen Azkuna Zentroan eta 2017tik Madrilgo Reina Sofia Museoaren dantzarako aholkularia da; 2010ean, Bulegoa  Zenbaki Barik arte eta ezagutza bulegoa abiatu zuen Leire Vergara,  Miren Jaio eta Beatriz Caviarekin batera, 2018an Gure Artea saria  lortuz.

ERAKUSKETA PROGRAMA

Erakusketa programari dagokionez, praktika artistiko garaikideari  eta ikerkuntza proiektuetara zabalik dago eta Sahatsa Jauregi eta  Irati Urrestarazu izango ditu gidari, Okela Sormen Lantegiko kideak  biak. Proiektu hori 2014an abiatu zen Bilbon, Euskal Herrian egungo  artearen testuingurua aktibatu eta artista plastikoen eta bisualen  arteko harremanak sustatzeko asmoz. Antolatu duten ekimen nagusien  artean daude Artist Meeting Point, artisten sare digitala eta  Getxoarte eta Bilboko Loraldia jaialdirako erakusketak.

Azkenik, Ibon Garagarza eta Miren Begoñe Bilbao arduratuko dira  bitartekaritza eta arte egoitzen programaz. Biak Euskal Herriko  Unibertsitateko (EHU) Arte Ederretan lizentziadunak dira eta 1998tik  arte hezkuntzan dihardute, zenbait erakunderekin elkarlanean. 2009tik  aurrera Zirri Marra Arte lantegia zuzentzen dute eta 2017an Bi  Hormetara erakusgunea zabaldu zuten; horren bitartez, lantegian  eginiko lana osatu eta artearen eremuan hezkuntza duen garrantzia  nabarmendu nahi dute.

Bukatzeko, Getxoko Kultur Etxeak gogoratu du ekainaren 4an  amaituko dela Getxoarte 2019ko erakusketa programaren eta programa  eszenikoaren sarietarako proposamenak aurkezteko epea.

Ekimen horien  bitartez arte plastiko zein eszenikoetan arte sormena bultzatu nahi  da. Sariak ibilbide profesionalaren hasieran dauden artistei  zuzenduta daude, eta 700 euro eta 1.000 euro banatuko dira, hurrenez  hurren. Guztira, zortzi proposamen aukeratuko dira erakusketa  programarako eta bost programa eszenikorako. Lan guztiak Romo Kultur  Etxean izango dira ikusgai, abenduaren 13tik 15era.