irailaren 2ra arte

Benito Ansola sarian izena emateko epea zabalik dago

09.02.2020 | 06:55
Benito Ansola sariaren logoa.

BILBO. Benito Ansola sarian izena emateko epea zabalik dago irailaren bira arte. Edizioa 18 eta 36 urte bitarteko gazteei dago bideratura. Aurten sariaz gain (3.000 euro), lan irabazlea Lekeitioko Euskal Zine Bileran estreinatuko da. Lehiaketaren oinarriak ezagutzeko www.kameratoia.eus web orrian daude ikusgai.

Antolatzaileek jakinarazi dutenez, Benito Ansola sariaren bosgarren edizioan "aurrerapausoak eman dira lanen aukeraketa prozesuan". Horrela, irabazlea hautatu aurretik, hiru lan aukeratuko dira, eta egileek epaileen aurrean aurkeztu beharko dituzte proiektuok Lekeition ospatuko den Euskal Zine Bileran. Saritutako lana jaialdiaren itxiera ekitaldian jakinaraziko da eta hamar hilabeteko epea egongo da proiektua burutzeko.

Proiektuak aurkezteko azken eguna irailaren 2a izango da. Horretarako lehiaketaren oinarrietan agertzen diren baldintzak bete beharko dituzte parte hartzaileek eta aurkezten dituzten lanek. Lehiaketaren oinarriak ezagutzeko www.kameratoia.eus web orrian sartu behar da.

Bestalde, gogoratu dute irailaren 30era bitarte dagoela zabalik Lekeitioko 42. Euskal Zine Bilerako lehiaketan parte hartzeko deialdia. Aurkezten diren lanen artean 20 izango dira aukeratuak lehiaketan parte hartzeko, eta egileek 200 euroko saria jasoko dute lehiaketarako hautatuak izanagatik.

"Euskal Zine Bilerak aurrerapausoak ematen jarraituko du aurten ere, euskal ikus-entzunezkoen erreferente bilakatuz, eta horretarako, noski, film sortzaile, artista eta zinemagile guztien partaidetza oso garrantzitsua izango da. Hori dela eta, aurtengo edizioan ere parte hartzera gonbidatzen zaituztegu", adierazi dute.