Getxoko Udalak urriaren 12ra arte mantenduko du zabalik euskararen gizarte erabilera babesten, sustatzen edota hedatzan lanean egon diren erakunde, elkarte zein pertsona fisiko nahiz juridikoen lana goraipatzen dituen Euskara Saria Argia Ereiten XII. lehiaketarako hautagaitzak aurkezteko epea.

Getxoko Udalak antolatuta, “ beste urte batez herritarrak animatu nahi ditugu beren inguruan, familian, kuadrillan, kultur, kirol eta abarreko elkarteetan euskararen alde egunero zerbait egiten duten pertsonak aurkeztera, herriaren esker onez jaso ahal izateko”, nabarmendu du Irantzu Uriartek, Euskara zinegotziak.

Hautagaiak aurkezteko fitxa posta elektronikoz euskara@getxo.eus helbidera bidal daiteke edo posta arruntez Getxoko Udaleko Euskara Zerbitzura (Foru kalea 1. 48992 Getxo), eta baita udal webgunean dagoen formularioa bete daiteke ere. Saria Ibon Garagarza eskultore getxotarraren lana da.

AURREKO SARIAK

Lehen edizioaren irabazlea Laura Lapeyra izan zen. SaridunakJuan Bautista Zabalaikastetxeko Gurasoen Elkartean euskararen erabileraren alde egindako lanagatik jaso zuen saria. Bigarrena Bittor Egurrolarentzat izan zen, bizitza osoa hizkuntza sustatzera dedikatzeagatik; hirugarrena San Nikolas ikastolarentzat, bere 50.urteurrenean euskarazko heziketan burututako lanagatik; laugarrena Nahikari Ayorentzat, udalerriko ikastetxeetan bertsolaritzaren alde egindako lanagatik; bosgarrena Gobela Ikastolarentzat, bere 50.urteurrenean; seigarrena Josu Esnaola eta Alfredo Lopez de Gereñu euskaltzaleentzat, euskararen alde egindako lana, eta bereziki udalerrian duela 20 urte baino gehiago abian jarritako Berbalaguna aitortzeko, zazpigarrena Goñi familiarentzat, Getxogaso gasolindegian egindako lanagatik, zortzigarrena Getxo Aixerrota Boleibol Kirol Taldeari, bere kirol jardueran euskara sustatzeagatik; bederatzigarrena ALBErentzat 1980an sortu zenez geroztik euskararen eta euskal kulturaren alde egindako lanagatik, eta hamargarrena Maren Goienaga Madariaga, C.D. Galea Senior A taldeko entrenatzaileari, klubaren barruan euskara sustatzeagatik, eta iaz Victoria Bengoa, Josu Larrañaga eta Armando Llamosasi, toponimia ibilbideen diseinuan eta edukien lanketan egindakoagatik.