Etxebarriko Jubilatuen Etxeak berriz irekita dauke. Gaurtik aurrera, antolatzen dituzten ikastaro eta jarduerak berriro egin ahal izango dituzte. Udala eta Jubilatuen Klubetako bi zuzendaritzak behin baino gehiagotan bildu dira jarduera hauek berriz hastea adosteko, eta orain, zuzendutako jarduerak berraktibatuko dira.
Hauen artean, gimnasia, pilates, yoga, korua, dantza ikastaroak, karta jokoak... “Azken asteetan udalerriko bi Jubilatuen Etxeetako zuzendaritzekin bildu gara, jarduerari berriz ekitearen egokitasuna baloratzeko. Bilera horietan, pandemiaren bilakaeraren hobekuntza eta murrizketen malgutasuna kontuan hartuta, etxeetako jarduera berrabiaraztea erabaki da, zuzendutako ikastaroak eta jarduerak aktibatuz”, azaldu dute Udaletik. Jarduerei dagokienez, karta-jokoak ere baimenduko dira, “betiere burbuila-taldeak mantenduz, mahai bera egunero eta gehienez zortzi pertsona mahai bakoitzeko”.
Nolanahi ere, maskara erabiltzea nahitaezkoa izango da uneoro jarduerak egiterako orduan. Gaurtik aurrera ere kafetegiak martxan jarriko dira ohiko ordutegian. “Bai zuzentarauek, bai Udalak, erabiltzaileen erantzukizunari dei egiten diogu, pandemiak gogorren astindu duen kolektiboetako bat delako”.
Etxebarriko Udalak eskerrak eman nahi dizkie bi zuzendariei, arduraz jokatuta eta erabiltzaileen ongizatean pentsatuta, “Etxeen jarduera suspertzeko prest daudelako”. Horrela, denbora luzez geldirik egon diren eta adinekoentzat oso garrantzitsuak diren hainbat jarduera berrabiarazi dira; izan ere, sasoian mantentzeko aukera ona izateaz gain, aisialdiko uneak sustatzen dituzten eta sozializatzeko bikainak zaizkien jarduerak ere badira.
