Sestaok hasieran onetsi du 50,8 milioiko aurrekontua
Udalak atzean utzi du aurrekontua luzatu izanaren hiru urteko aldia eta etapa berri bati aurre egingo dio erronkaz beteta pertsonen eta udalerriaren ongizatea hobetzen jarraitzeko
Ostiral honetan, ekainaren 12an, egindako ezohiko bilkuran,Sestaoko Udalak 50,8 milioi euroko udal-aurrekontua onetsi du 2026. urterako. Horri esker, funtsezko tresna berreskuratu da udalerriaren etorkizuna egonkortasun, segurtasun eta jarduketa-gaitasun handiagoaz planifikatzeko.
Aurrekontu berria Gobernu Taldeak (EAJ-PNV eta PSE-EE) bultzatu du, eta % 4,7 hazi da 2023. urtean onetsi zen azken aurrekontuarekiko bi lehentasunei erantzuteko: pertsonen ongizatea indartzea eta Sestao eraldatzen jarraitzea inbertsio berrien bitartez eta auzoak hobetuz.
Gorka Álvarez alkateak azpimarratu du aurrekontu hau onesteari esker, “urrats garrantzitsua egin dela udal-kudeaketari egonkortasuna emateko eta ilusioz betetako etapa berri bati aurre egiteko. Etapa berrian gure udalerria eraldatzen jarraituko dugu eta hura eratzen duten pertsonak zaintzen ere bai”. Aurrekoaren harira, alkateak azaldu du “ez dugula etenaldiko aurrekonturik aurkezten, erantzukizuneko, inbertsioko eta jarduketako aurrekontua baizik. Arau fiskalek zuhurtziaz lan egitera behartzen gaituzte, baina horrek ez du saihesten Sestaok funtzionatzen jarraitzea”.
Bestalde, PSE-EEko bozeramailea den Carlos García de Andoinek aipatu du aurrekontuak “Gobernu Taldearen borondatea islatzen duela Sestao modernoagoa, kohesio handiagokoa eta prestatuagoa eratzeko hurrengo urteetako erronkei aurre egite aldera, batetik, zerbitzu publikoak indartuta eta, bestetik, herritarrentzako aukera berriak sortuta”. Halaber, azpimarratu du kontu hauek “ziurtasuna eskaintzen dietela Sestaoko herritarrei eta ekonomia- eta gizarte-ehunari. Hala, aurrerapausoak eman daitezke gure herritarren bizi-kalitatea hobetzen jarraitzeko ibilbidean”.
Azkenik, Ogasun eta Ondareko zinegotzia den David Sánchezek nabarmendu du aurrekontu “serioa, orekatua eta aurrekontu-egonkortasunaren esparrura doitua dela”, baina gastuaren sabaia indarrean jartzeak baldintzatu du. “Aurrekontu honek Udalaren ohiko oinarria bermatzen du, eta kreditu-aldaketek Sestaok behar duen inbertsioa aktibatzen uzten dute”.
Baliabide gehiago pertsonentzat eta zerbitzu publikoetarako
Diru-sarrerak gehitu dira, nagusiki, Europako funtsen eta udalaz gaindiko erakundeen dirulaguntzak eskuratu direlako, hirigintza-eremu berriak garatu direlako, besteak beste, La Naval eta Txikito Bidea, eta Bizkaiko Foru Aldundiak Bizkaiko udalei banatzen dien Udalkutxa funtsaren ekarpena handiagoa izan delako. Halaber, laguntzen du, neurri txikiagoan izan arren, udal-tasak eta -zergak eguneratzeak.
Oraindik ere aurrekontuaren lehentasun nagusia da pertsonen arreta eta kalitatezko zerbitzu publikoei eustea. Langileen gastuak 20,8 milioi eurora iristen dira (aurrekontuaren % 41); bien bitartean, udal-zerbitzuak funtzionatzeak eta mantentzeak 23,1 milioi euroko hornidura dute (aurrekontuaren % 45). Beraz, aurrekontuaren 10 eurotik ia 9 Sestaoko Udalak goizero pertsiana altxatzera bideratuko dira.
Inbertsioak eta udalerriaren eraldaketa bultzatzea
Kontuek, hasiera batean, 1,5 milioi euro gordetzen dituzte inbertsioetarako. Hala eta guztiz ere, ezohiko bilkura berean zenbait kreditu-aldaketa onetsi dira honako hauekin lotuta: diruzaintzako gerakina, Europako funtsekin lotutako diru-sarrera finalistak eta La Naval eremuaren eragiketatik datozen hirigintza-aprobetxamenduak. Horiei esker, beste 7 milioi euro gehituko zaizkio aurrekontuari hiri-eraldaketako eta auzo-hobekuntzako jarduketak gauzatzeko. Gainera, Udalak 8,5 millioi euro kudeatuko ditu inbertsio berrietarako.
Jarduketa horien artean daude igogailuak instalatzeko proiektuaren lehenengo fasea Arturo Campionen, Markonzagako parkea hobetzea, Vista Alegre auzunea berrurbanizatzea, Aizpuru eta Doctor Fleming arteko bidegurutzean irisgarritasuna hobetzea, aldi baterako aparkalekua egokitzea Rebonzako orubean, udal-lokal bat egokitzea Hiru Kontzejuen plazan, La Benedictara iristeko sarbidea konpontzea, zenbait jarduketa ikastunen eskolan, ur-zorrotaden parkea sortzea, inbertsioak haurrentzako parkeetan eta bide-publikoetako mantentze-lanak indartzea, bereziki auzoetan.
Gizarte-politiken eta enpleguaren aldeko apustu irmoa
Halaber, aurrekontuak asko indartzen du gizarte-arloa (12,2 milioi euro). Juan Ellacuría Udal Egoitzak 3,6 milioi euroko hornidura izango du, eta beste 5 milioi erantsiko zaizkio gizarte-laguntzako programetarako, besteak beste, 2 milioi euro etxeko laguntza-zerbitzurako, 1,5 milioi euro gizarte-larrialdiko laguntzetarako, 2,2 milioi Behargintza eta enplegu-politikak bultzatzeko, milioi erdi euro eskola-beka eta hezkuntza-programetarako eta 200.000 euro baino gehiago berdintasun-programarako.
Azkenik, kontuek nabarmenki gehitu dituzte baliabideak udalerriko gizarte-, kultura- eta kirol-bizitzarako. Hala, udal-jarduerak, jaiak, kirol-programak eta euskararen sustapena indartu dira, bai eta dirulaguntzak eta hitzarmenak elkarteekin, klubekin eta toki-erakundeekin ere.
Hasieran onetsi ondoren, 2026ko aurrekontu orokorra jendaurrean jarriko da hamabost egunez Bizkaiko Aldizkari Ofizialean eta Udaleko iragarkien taulan argitaratuz, erreklamazioak egiteko.