Sestaok 10 milioi euro inguruko inbertsioa egin du gizarte-konpromisoa indartzeko

Sestaoko Udaleko Gizarte Ekintza eta Berdintasun sailak 10 milioi euro inguru bideratu zituen 2025ean udalerriaren gizarte-konpromisoa indartzeko. Astelehen honetan goizean, apirilaren 27an, sailaren iazko jarduera-memoria aurkeztu dute.

Sail honek Udaleko aurrekonturik handienetakoa kudeatzen du, Juan Ellacuria udal-egoitza barne, eta pertsonentzako politika publikoen funtsezko zatia biltzen du, zaintzei, arretari eta herritarren bizi-kalitatea hobetzeari erreparatuz.

Jarduketa-ildo nagusien artean azpimarra daitezke adinekoentzako, dibertsitate funtzionala duten pertsonentzako, egoera kalteberan dauden kolektiboentzako eta indarkeria matxistaren emakume biktim+entzako programak.

Gorka Álvarez alkateak nabarmendu du memoriak “erakusten duela zifra bakoitzaren atzean laguntza, babesa eta erantzun publiko hurbila behar duten pertsonak, familiak eta bizi-ibilbideak daudela. Sestaon gizarte-ekintza eta berdintasuna udal-lehentasuna dira, bai eta funtsezko tresna ere udalerriko gizarte-kohesioa indartzeko”.

Bestalde, arloko zinegotzi den Yosune Serapiok azpimarratu du “Udalaren helburua dela garaiz iristea, behar handienak dituenari eustea eta baliabide sare erabilgarriarekin, anitzarekin eta udalerriko errealitateari egokitzen zaionarekin egitea. 2025eko memoriak argi uzten du egunero sailak egiten duen lan izugarria eta Udalaren konpromisoa gizarte-politiken alde”.

Adinekoentzako programak

Memorian zehatz-mehatz ageri dira azken urtean bultzatutako programak, zerbitzuak eta jarduketak eta haien inpaktua Sestaoko herritarrengan. Udal ekintzaren ardatz bat da Etxeko Laguntza Zerbitzua. 2025ean 232 erabiltzaile artatu zituen, 53.213 orduko arreta eman zen, eta 1.818.268,44 euro inbertitu ziren.

Hari gehitu behar zaio 80 urtetik gorako adinekoen etxeetan suteak detektatzeko programa, pertsona horiek bakarrik bizi diren kasuetarako. 55 instalazio berri egin ziren 2025ean eta 458 etxebizitza zeuden detektagailu eraginkorrarekin abenduaren 31n.

Mendekotasunaren arretaren esparruan, 1 graduko mendekotasun-egoeran dauden adinekoentzako Udalaren egoitza-zerbitzuak 28 pertsona artatu zituen urtean; bien bitartean, eguneko arreta-zerbitzuak 3 erabiltzaile izan zituen.

Halaber, aipatzekoak dira adinekoentzako udal-baliabideak erkidegoaren eta zahartze aktiboaren ikuspegitik. Udal-zentroek 2025. urtea 4.383 bazkiderekin amaitu zuten, 222 alta berri izan ostean. Guztira, 55 ikastaro eta tailer eman ziren, 1.327 prestakuntza-ordurekin eta 1.127 plaza okupaturekin, beste zerbitzu batzuez gain, hala nola podologia, ile-apaindegia, kultur irteerak, txangoak eta gizarteratze-jarduerak.

Gizarte-babeseko programak kolektibo kalteberentzat 

Gizarte-babesaren arloan, memoriak dio 2025ean gizarte-larrialdiko laguntzak 694 bizikidetza-unitateri iritsi zitzaizkiela eta 1.063.525,16 euro banatu zirela guztira. Gainera, ez zen laguntzarik ezetsi aurrekontu-kontsignaziorik ez zegoelako. Puntu honetan, garrantzitsua da nabarmentzea Sestao Eusko Jaurlaritzarekin lankidetzan diharduen udalerri gutxietako bat dela Euskadin, eta bitarteko propioak jartzen dituela programaren estaldura bermatzeko eta familiarik ez gelditzeko arretarik gabe.

Hezkuntzaren eremuan, eskola-jangelarako udal-laguntzen barruan 181 ikasle izan diren onuradun 2024/2025 ikasturtean, eta eskola-liburu eta -materialen laguntzetan 185. Hemen ere ez zen bakar bat ere ukatu aurrekonturik ez zegoelako. Halaber, Udalaren esku-hartzea egoera bereziki kalteberetara iristen da. Taper Solidarioaren programak 2025ean guztira 16.243 anoa banatu zituen 77 pertsonen eta 39 bizikidetza-unitateren artean, eta, gainera, egoera onean zeuden 9.000 kilo elikagai botatzea saihestu zen.

Era berean, Gizarte Ekintza eta Berdintasun Sailak lankidetzan dihardu San Vicente de Paúl elkartearekin Elikagaien Bankua tokiko zerbitzuari eusteko. Zerbitzu horren bidez, oinarrizko produktuak eta elikagaiak ematen zaizkie kalteberatasun-egoeran dauden pertsonei, baldin eta udalerrian erroldatuta badaude, gizarte-bazterketaren arriskua prebenitzeko. 2025ean, baliabide honen bidez, 82.199 kilo elikagai banatu zitzaizkien 550 familiei, eta 2.500 pertsona baino gehiagora iritsi zen.

Bestalde, Udalak esleituta dituen eskumenak betetzeko, behin-behineko egoitza eman die bizitegi-baliabiderik ez zuten pertsonei. Hala, 2025ean, 69 pertsona artatu ditu, eta behin-behineko ostatua eman zaie inguruneko hoteletan.

Bestalde, zaintzaileak laguntzeko programaren tarteko, 41 erabiltzaile kudeatu ziren banakako arretaren, laguntza-taldeen, prestakuntzaren eta sentsibilizazio ekintzen bidez.

Berdintasunerako eta indarkeria matxistaren emakume biktimei laguntzeko programak

Berdintasunaren eta emakumeen arretaren esparruan, 2025ean, genero indarkeriaren 40 emakume biktima artatu ziren Oinarrizko Gizarte Zerbitzuetan edo Ertzaintzara bideratu ziren jarraitzeko.

Harrera-etxearen zerbitzuak 2 emakumeei erantzun zien, eta arreta psikologikoaren eta orientabide juridikoaren programak 74 emakume artatu zituen psikologiaren arloan eta 50 arlo juridikoan Neba-Neba elkartearen bitartez.

Horrez gain, Gizartearen eta Hezkuntzaren arloetan Esku-hartzeko Zerbitzuak eta Arreta Psikosozialaren esparrukoak, esku-hartze egonkorra izan zuen: 125 adingabe eta 177 heldu. 136 espediente izapidetu ziren gizartearen eta hezkuntzaren arloan eta 29 arlo psikosozialean, beraz, argi dago garrantzitsua dela prebenitzeko eta familiak lagundu nahiz babesteko lana.

2023-2027 aldirako Mendekotasunei buruzko lehenengo Tokiko Planaren eremuan, 2025ean guztira 43 ekintza gauzatu dira. Hartzaile nagusia hezkuntza izan da. Derrigorrezko irakaskuntzan diharduten udalerriko ikastetxe guztietara iritsi da. Hainbat tailer eta jarduera egin dira guztira 2.554 ikaslerekin aritzeko. Beste ekintza batzuek talde desberdinentzat (amak, aitak, monitoreak eta irakasleak) guztira 118 plaza estali dituzte.

Azkenik, gizarte-zerbitzuetan desgaitasun fisikoa duten pertsonen partaidetza eta gizarteratzea sustatzeko programaren bidez, 90 pertsonei baino gehiagori eman zaie informazio pertsonalizatua AFISES elkartearen bidez, eta laguntza psikologikoko zerbitzuek eta tailer desberdinek guztira 48 partaide izan dituzte.

Langile-kopurua gehitzea

Memoria honekin, Sestaoko Udalak herritarrei berri emateaz gain, balioa eman nahi dio askotan isila den lanari, funtsezkoa baita adinekoei, familiei, emakumeei, adingabeei eta herritarrei laguntzeko urte guztian zehar.

Hurrengo hilabeteetan, Gizarte Ekintza eta Berdintasun Arloak langile-kopurua gehitu nahi du erronka berriei aurre egiteko, besteak beste, migratzaileen ezohiko erregularizazio-prozesuari edo udalerriko biztanle-hazkuntzari.

Aurrekoaren harira, bi gizarte-langile berri hartu nahi dira, eta hirugarren pertsona ba behin-behineko indartze-programaren bidez.​