Bihar, ekainaren 15an, Galdakaoko Udala edukiontzi marroiak erabiltzeko beharrezkoak izango diren txartel berriak banatzen hasiko da. Herritarrek ESAN arretarako bulegoan eskuratu ahal izango dituzte.
Bilketa pneumatikoko sistema erabiltzen dutenek ez dute euren txartela aldatu beharko, egun erabiltzen dutena baliagarria izaten jarraituko baitu.
Gainerako erabiltzaileek, txartel berria jasotzeaz gain, hori aktibatu egin beharko dute erabiltzen hasi aurretik, entregatze hutsak ez baitu automatikoki operatibo bihurtzen. Aktibatzea ESAN bulegoan bertan egin daiteke, txartela eskuratzeko momentuan.
Lehenengo astean zehar, ekainaren 15a eta 19a bitarte, zerbitzua kudeatzen duen enpresako langileak bertan izango dira herritarrei laguntza emateko eta sor daitezkeen zalantzak argitzeko.
Uztailera arte zabalik
Herritarrek sistema berrira egokitzeko eta dagozkien txartelak jasotzeko denbora izan dezaten, hondakin organikoen edukiontziak ekainaren 30era arte egongo dira irekita. Data horretatik aurrera, berriz, edukiontziak txartelarekin soilik ireki ahal izango dira.
Organikoa biltzeko herrian dagoen edukiontzi kopurua hirukoiztu egin da berriki, zerbitzua auzo gehiagotara hurbilduz eta hondakinen bereizketa eta birziklapena sustatuz. Helburua argia da: herritarrei tresna erosoagoak eskaintzea eta hondakinen kudeaketa gero eta jasangarriagoa izatea. Horretarako egokitu da sistema eta aurrera begira birziklatzea zerga bidez saritzea da asmoa.
Izan ere, Galdakaoko Udalak birziklatze tasak hobetzeko eta herri jasangarriago bat eraikitzen jarraitzeko bidean hondakinak behar bezala bereiztea funtsezkoa dela gogorarazten du. Horregatik, herritar guztiak animatzen ditu txartel berria eskuratzera eta hondakin organikoen edukiontziak erabiltzera.
