Síguenos en redes sociales:

Larunbatean ospatuko da Durangoko Abesti Feministen VIII. Lehiaketaren amaiera-ekitaldia

19:00etan egingo da Plateruena Musika Aterpean, eta EITBk zuzenean emango du streaming bidez

Deia

Bilbao | 25·03·26 | 06:00 | Actualizado a las 08:53

Larunbatean ospatuko da Durangoko Abesti Feministen VIII. Lehiaketaren amaiera-ekitaldiaD. U.

2026ko Abesti Feministen Lehiaketaren zortzigarren edizioak larunbatean, martxoaren 28an, biziko du bere azken eguna. Arratsaldeko 19:00etatik aurrear, Plateruena Musika Aterpeak Durangoko Udaleko Berdintasun sailak antolatutako ekimen honen amaiera-ekitaldia jasoko du. Bertan, abesti finalistak publikoaren aurrean zuzenean kantatuko dira.

Ekitaldiak, gainera, EITBren laguntza izango du, finala zuzenean emango baitu streaming bidez, webgunea eta beste plataforma digital batzuen bidez. Laguntza horri esker, ekitaldiak hedapen eta irisgarritasun handiagoa izango du, eta jarraipena hainbat formaturen bidez bermatuko da, hala nola podcast, IPTV, HBBTV, kable eta satelite bidez. EITBk, halaber, ekitaldiaren laguntzaile ofizial gisa jardungo du. 

Emanaldiak amaitu ondoren, epaimahaiaren erabakia jakinaraziko da eta sariak banatuko dira. Lehiaketak 600 euro garbiko sari ekonomikoak aurreikusten ditu 30 urtetik beherakoen kategorian bakarlari eta taldeen abesti onenentzat, eta 500 eurokoak 30 urtetik gorakoen kategorian. Halaber, publikoaren sari bat eta euskarazko abesti onenari beste bat emango dira, biak 350 eurokoak, eta 130 euroko aipamen bereziak ere izango dira. 

Bozketa, zabalik

Gogorarazi behar da 2026ko Abesti Feministen VIII. Lehiaketaren bozketa herrikoia oraindik zabalik dagoela eta azken egunetan sartu dela; horregatik, Udalak herritarrei botoa epea itxi aurretik ematera gonbidatzen die. Bozketa martxoaren 27ko 12:00ak arte egongo da zabalik, eta udalaren parte-hartze plataformaren bidez egin daiteke https://partehartu.durango.eus/abesti-feministak. Durangon erroldatutako 16 urtetik gorako pertsonek botoa eman dezakete, finalisten artean abesti bakarra aukeratuz: Mirar a otro lado, Esnatu, Sekretua, Only a Prey, Emakumeon martxa, Marea morea, La vida soy yo, La vida es ella, As I am, Bloom eta Denona da.

Kontzertuaren kartela.

Ekimen honen bidez, Durangoko Udalak berdintasunarekin eta kulturarekin duen konpromisoa berresten du, gizartea eraldatzeko tresna gisa, eta herritarrak gonbidatzen ditu bai bozketan bai lehiaketaren edizio honi amaiera emango dion ekitaldian parte hartzera.