Lekeitioko Emakume Sortzaile eta Ekintzaileen azokaren edizio berria martxan
Martxoaren 15ean izango da eta izena emateko epea zabalik dago datorren otsailaren 15era arte
Datorren martxoaren 15ean Emakume Sortzaile eta Ekintzaileen IX. azoka ospatuko da Lekeition. Hori dela eta zabalik dago otsailaren 15era arte izena emateko epea.
Bederatzigarren edizioa izango duen ekimen honek emakume sortzaile eta ekintzaileen topagune izaten jarraituko du, euren proiektuak eta lanak ezagutarazteko aukera eskainiz.
Azoka herriko plazan egingo da 11.00etatik 14.30era, Emakumeen Nazioarteko Eguna ospatzeko jardueren barruan, eta 24 postu bilduko ditu arte sorkuntzarekin, artisautzarekin eta emakumeen ekintzailetzarekin lotutako proiektuekin. Euria eginez gero, elizapea ahalbidetuko da nahiago duenarentzat.
Udalak argitaratutako oinarrien arabera, jarduera ekonomikoetan alta emanda dauden eta beren sorkuntzaren ondorioz produktuak aurkezten dituzten adin nagusiko emakumeek parte hartu ahal izango dute. Hautaketa-irizpideen artean, bereziki balioztatuko dira Lekeitiorekin eta Lea-Artibai eskualdearekin duen lotura, euskarazko arreta, materialen iraunkortasuna eta proposamenen izaera berritzailea.
Jarduera artistikoa eta ekintzailea sustatzeaz gain, azokak, sortzaileen eta herritarren arteko topagune bat sortu nahi du, tokiko ehun kulturala indartuz eta emakumeek egindako produktuen kontsumoa sustatuz. Udalak mahaiak, salmenta baimenak eta laguntza logistikoa emango dizkie parte-hartzaileei, eta otsailaren 15a baino lehen aurkeztu beharko dituzte eskabideak.