10,9 milioi euroko aurrekontua izango du aurtengoan Lekeitioko Udalak

EH Bilduren baiezko botoekin eta EAJren abstentzioarekin, Lekeitioko Udalak beste hainbat ekimen aurrera atera nahi ditu. Bada, eta lurralde garapena eta ekonomiaren alorrean, Maderas de Lekeitioko gunez gain, non “XXI. mendean dituen erronkei erreparatuta, plan zehatza egin beharko” den, Next Generation delako diru funtsetatik milioi bat euro daude udalerrirako. Eta nabarmendu dutenaren arabera, dirulaguntza horrekin “parkingak digitalizatu, Isuntza hondartzaren puntan dagoen Mendieta Ontziolaren eraikina berreraiki –sorosleak, taberna/jatetxea, komunak jarriko dira bertan–, Trinketeko aterpetxean eguzki plakak jarri edota Garraitz irlako eremu erlijioso militarreko aztarnak egonkortuko” dira.

Lekeitio berrantolatzeko ere badira zenbait ekimen. Hala nola, parking sistema berrituko, bizikletak eta motorrak aparkatzeko leku berriak egokitu edota zebra-bideak egokitu. Eta gizarte zerbitzuak eta ongizate alorretan, eta “zaintza erdigunean ipintzeko, lehenengo eta behin, fokoa Lekeitioko egoitzan jarri dugu”. Uribarren-Abaroa egoi-tzan, “errealitatea zein den jakiteko kanpo enpresa batekin diagnostikoa egin da. Hortik letozke ondorengo neurriak”. Hezkuntza arloan, Lekeitioko ikastetxeen artean “hezkuntza ekimen bateratuak” sustatuko dituzte eta eskoletan, patio inklusiboa eraikiko dituzte. Azkenik, parekidetasun alorrean, “herri mailako protokoloa eguneratu eta berriztuko” dela aurreratu dute; gazteria sailean “emantzipaziorako plan osatua” diseinatuko dute; “eskualdeko lurretan baso bat erosiko” da,eta Udal eraikin batzuetan eguzki plakak ipiniko dira, “daudenak konpondu eta energia berriztagarrien udal-sarea” osatuz.

Abstentzioa EAJk zenbait kontu salatu zituen. “Gastu arrunta nabarmen handitu dela, gardentasunik eta herritarren parte-hartze prozesurik eman ez dela eta Lekeitio hobetzen jarraitzeko inbertsio proiektu berririk ez dagoela” izan ziren gai nagusiak. Jeltzaleen “kezkagarritzat” jo zuten EH Bilduk aurkezten dituen aurrekontuetan ez sartu izana “oposizioan zeudenean egiten zituzten ekarpen” batzuk; hala nola, “herrian aterpea sortzea, Abaroa Jauregia berreskuratzea edota Maderas de Lekeitio herriratzeko inbertsioak gauzatzea. Badirudi lehentasunak aldatu direla”, nabarmendu zutenez. Eta, bestalde, “ agerian geratzen ari da ia urte bete daraman gobernu honen inmobilismoa eta etorkizunera begirako herri proiektu falta”. EAJ bost zuzenketa proposatu zituzten –Zumatzeta-San Inazio gunearen berriztatzea, Maderas de Lekeitio herriratzea, Eraztun Berdea amaitzea, etxebizitzen arazoari aurre egitea eta Alde Zaharra birgaitzeko plan berezia eguneratzea– eta egindako ekarpen gehienak onartu zituen udal gobernuak. Hala ere, “2024an zehar jarraipen zorrotza” egingo dutela adierazi zuten, “eskariak burutzen direla ziurtatzeko”.