Ostiralean hasiko da Getxoko Komiki Azoka

Hemen da Getxoko Komiki Azokaren edizio berri bat. Datorren ostiraletik igandera bitartean, hau da, irailaren 29etik urriaren 1era arte, komikizaleek halabeharrezko hitzordu bat izango dute dagoeneko mitikoa den jaialdi honen 21. edizioarekin. Ekitaldia Areetako Geltokia plazaren ingurualdean egingo da, baina ohi bezala Romo Kultur Etxean hainbat jarduera egingo dira baita ere. Sarrera doakoa izango da.

Gaur bertan egin den aurkezpenean, Getxoko alkate Amaia Agirrek azpimarratu du "Getxok komikiaren alde urtero egiten duen apustua, ez bakarrik artistikoaren eta kulturalaren alde, baizik eta baita hedabide horrek publiko desberdinak erakartzeko duen gaitasunaren alde ere, eta kultura eta balio desberdinak transmititzeko tresna gisa duen balio pedagogikoaren alde".

Komikiaren aldeko apustu hori gauzatzeko, Getxok 40 salmenta-postu bilduko ditu merkataritza-gunean (Areetako Geltokia plaza). Liburu-dendek, argitaletxeek, merchandising-establezimenduek eta fanzineek osatzen dute, besteak beste, jendeak azken nobedadeak eskuratzeko, bere serieak osatzeko eta komiki zaharrak eta bildumagile-aleak erosteko aukera izango duen postuen eskaintza, baita komikigintzaren munduarekin zerikusia duten era guztietako artikuluak ere.

Bestalde, Romo Kultur Etxeak ekintzen programazioa hartuko du, nobedadeen aurkezpenak, hitzaldiak, mahai-inguruak, proiekzioak, tailerrak eta erakusketa bat barne. Bertan, sektoreko enpresa nabarmenetako batzuk izango dira, eta hitzaldietan, aurkezpenetan eta, nola ez, sinaduren txandetan parte hartuko dute, zaleek euren artista gustukoenak bertatik bertara ezagutzeko aukera izan dezaten. Sinadura-txandak leku horretan zein salmenta-postuetan egingo dira.

Borja Crespok, azokako programazio koordinatzaileak, artista gonbidatuen kalitatea azpimarratu du eta, bereziki, Borja Gonzalezen presentzia, 2023ko Komiki Sari Nazional izendatu berria, Getxon aurkeztuko baitu bere azken lana, "Las tres noches" trilogiari amaiera emanez. Gainera, Extremadurako sortzaileaz gain, Ana Miralles madrildar idazle beteranoa eta Mikel Begoña bilbotar sortzailea, David López, Fran Galán eta Natacha Bustos, amerikar mainstreamerako egin duten hiru artista, gehitu behar zaizkio. Amaia Arrazolak, Oriol Estrada dibulgatzaileak eta Pedro Cifuentesek osatzen dute aurtengo gonbidatuen zerrenda, Shaun Elay ilustratzailea ahaztu gabe.

Azken hori izango da Romo Kultur Etxeak hartuko duen erakusketaren protagonista, eta bertan ilustratzaile honen lanak erakutsiko dira, zuzenean negatiboan, zuzenean eta formatu handian marrazteko gai den artista bakarra baita munduan. Azkenik, tailerren programazioaren barruan, 6 eta 12 urte bitarteko haurrek modu aktiboan gozatu ahal izango dute formatu honen sortze-prozesuaz. Tailerrek ez dute aldez aurretik izena eman beharrik izango.