Ezagutzera eman dira dagoeneko tokiko musika sustatzea helburu duen Hiriko Soinuak lehiaketaren bosgarren edizioko irabazleak. Sari nagusia Deñek irabazi du; Lorreinek, Barakaldoko artistarik onenaren saria; Berdintasun saria Eva Martínentzat izan da, eta euskarazko artistarik onenaren saria, aldiz, PainApplek irabazi du.
Finala joan den larunbatean, irailak 23, ospatu zen Barakaldoko San Bizente parkean eta 500 pertsona inguru bertaratu ziren. Bederatzi artista aritu ziren: Deñe, Muzak eta PainApple, kategoria nagusiko finalistak; Laztana Laztana, Lorreine eta Yeray, Barakaldoko artistarik onenaren kategoriako finalistak; eta Anixe, Eva Martín eta Sofía V, Berdintasun sariko finalistak. Emanaldiak amaitzean, eta epaimahaiaren deliberazioaren ondoren, kategoria horietako proposamen irabazleen izenak jakinarazi ziren, baita euskarazko artista onenaren sariaren irabazlearena ere, PainApple-ena, alegia.
Deñe azpeitiar kantautore gaztea da, Hiriko Soinuaken 2022. edizioko Berdintasun kategorian finalista izan zena eta aurten sari nagusia lortu duena. Lorreine energiaz eta alaitasunez beteriko pop-rock laukotea da, eskarmentu handiko zuzenekoarekin; Eva Martín pop kantautore gaztea Portugaletetik dator; eta PainApple Gipuzkoako Debabarrenetik datorren pop-punk taldea da.
Saritutako lau proposamenak urriaren 20an eta 21ean Barakaldoko Herriko plazan egingo den Hiriko Soinuak doako jaialdian arituko dira, Def Con Dos eta La banda trapera del río (ostirala 20) eta 091 (larunbata 21) kartelburu direla.
"Hiriko Soinuak lehiaketaren bosgarren final honek emakumeen ordezkaritza zabala uzten digu talde eta bakarlari finalisten artean, urtetik urtera hazten ari den datua. Gainera, berriz ere oso bataz besteko adin baxua izan dugu parte hartu duten proposamenen artean. Eta berriz ere maila nabarmena eman eta giro bikaina sortu zuten San Bizenten.
Zorionak eman nahi dizkiegu irabazleei, orain hasiko baitute saria gozatzen hasteko epea, urriaren 20an eta 21ean Herriko plazan egingo den jaialdiko emanaldietatik hasita. Baina gogoratu nahi ditugu, baita ere, gainerako finalistak eta, oro har, Hiriko Soinuak lehiaketaren bosgarren edizio honetan izena eman duten 142 proposamenak eta finalera joan zen publikoa, pertsona horiek guztiek ematen baitiote zentzua ekimen honi urtero", adierazi du Jonathan Martín Barakaldoko Udaleko Gazteria zinegotziak.
Herriko plazako emanaldiez gain, Hiriko Soinuak lehiaketako gainerako sariak honako hauek dira:
- Deñe (kategoria nagusiko artista onena)
Disko bat grabatu, ekoitzi eta masterizatzea Gaua Produccionesen estudioan
- Lorreine (Barakaldoko artistarik onena)
Disko bat grabatu, ekoitzi eta masterizatzea Gaua Produccionesen estudioan
- Eva Martín (Berdintasun saria)
4 abestik osatutako EP bat grabatu, ekoitzi eta masterizatzea Gaua Produccionesen estudioan.
- PainApple (euskarazko artistarik onena)
4 abestik osatutako EP bat grabatu, ekoitzi eta masterizatzea Gaua Produccionesen estudioan.
