Guraso eta etorkinentzako euskara ikastaroetan izena emateko epea zabalik dago Bermeon

Bermeoko Udalak guraso eta etorkinentzako euskara ikastaroetan izena emateko epea ireki du. Ikastaro hauetan izena emateko epea irailaren 29ra arte egongo da zabalik. Nadia Nemeh Shomaly alkateak eta AEK euskaltegietako eta Hizkuntza Eskolako arduradunek ohar batean azaldu dute ekimena.

Gurasoentzako ikastaroen helburua "euskararen transmisioa bermatzea eta ikastea erraztea" da, eta horretarako, AEK euskaltegiak eta Bermeoko Udalak urteak daramatzate elkarlanean eta "emaitza oso onak" lortzen. Ikastaroek 120 orduko iraupena eta 20 euroko prezioa izango dute.

Bigarren euskara ikastaroa etorkinei zuzenduta dago. Ikastaro hau Bermeoko Udalaren eta Gotzon Garitaonaindia euskaltegiaren arteko lankidetzaren emaitza da eta bere helburu nagusia etorkinei euskara ikasteko aukera eskaintzea da, "integrazio errazagoa izan dezaten". 120 orduko iraupena izango du eta 10 euroko prezioa izango du, material didaktikoa kontuan hartu gabe.

Ikastaroak urrian hasiko dira eta izena emateko epea irailaren 29ra arte egongo da zabalik. Matrikula Udal Bulegoan egin beharko da. Euskara ikastaroak eskaintzen dituzten hiru ikastetxeek (Hizkuntza Eskola, AEK eta Gotzon Garitaonaindia) dagoeneko hasita dute 2023-2024 ikasturterako matrikulazio kanpaina, eta Bermeoko Udalak eta HABEk dirulaguntzak eman dituzte euskara ikasteko.