BILBO. Hurrengo asteartean, irailak 1, Bizkaibus zerbitzuaren ohiko ordutegi eta maiztasunak berrezarriko dira, udako egutegiari amaiera emanda. Hori bai, Leioako Campusera iristen diren Bizkaibusen 23 lineak erabat martxan egongo dira irailaren 7tik, astelehena, aurrera, eta guztiz derrigorrezkoa izango da musukoa erabiltzea eta Barik bidez ordaintzea.
A3247 Bilbo - Aireportua lineak 30 '-ko gaur egungo maiztasuna mantenduko du lanegunetan eta 60'-koa jaiegunetan, eta A3932 Galdakao- Metroa Bolueta lineak Boluetatik 01:55etan abiatzen den azken espedizioaren ezabaketarekin jarraituko du, osasun-larrialdiko egoera dela-eta Euskal Autonomia Erkidegoko garraio publiko osorako ezarritako ordutegiarekin bat etorriz.
Gainera, UPV/EHUko Bizkaibusen zerbitzua, data horretatik aurrera, lehen alarma-egoeraren aurretik zuen normaltasuna lehengoratzen hasiko da. Horrek esan nahi du Leioako Campusean zerbitzua eman ohi duten hiriarteko 23 garraio lineak erabat martxan egongo direla irailaren 7tik, astelehena, aurrera puntako orduetako errefortzuak barne.
23 linea horietatik 10, hala ere, dagoeneko funtzionatzen ari dira edo asteartetik, hilak 1, aurrera ordutegi murriztuarekin funtzionatuko dute administrazioko langileen beharrei erantzuteko edo presentzialtasuna eskatzen duten izapideei aurre egin ahal izateko
Ordutegi eta maiztasun berriak esteka honetan daude eskuragarri. Edozein zalantza argitzeko kontsultatu 946 125 555 doako informazio-telefonoa edo Bizkaibuseko Facebook eta Twitter profil ofizialak.
"Egungo egoerak zuhurtzia osoz jokatzea gomendatzen du", adierazi du Miguel Angel Gomez Viarrek, Garraioak eta Mugikortasun Jasangarria Sustatzeko diputatuak. "Hori dela eta, datorren asteartetik oro har lantoki eta ikasketa-tokietara itzultzeko beharra dagoela aurreikusiz, Bizkaibusek operatibo osoa eskainiko du segurtasunik handiena bermatzeko, azken hilabeteetan gomendatutako ordutegi- edo zerbitzu-murrizketarik gabe". "Horrela, garraio publikoaren zerbitzua ahalik eta baldintza onenetan ematea bermatzen dugu".
BARIK TXARTELA BAINO EZ
Gainerakoan, musukoa nahitaez erabiltzea eta Barik txartelarekin ordaintzea mantentzen dira, eta ez da eskudirurik onartzen.
Era berean, ezinezkoa izango da autobusaren lehen bi lerroak erabiltzea eta aurreko atetik sartzea, gidariekiko urruntze fisikoa bermatzeko neurri gisa; beraz, aurrerantzean ere sarrera eta irteera atzeko ateetatik egingo dira.
