'Argizaiola Trofeoa' erakusketa, ikusgai Abandoko Udaltegian

Ostiral honetan, ekainaren 5ean, arratsaldeko 19:00etan, 'Argizaiola Trofeoa' izeneko erakusketaren inaugurazioa egingo da Abandoko Udaltegian, Expodistrito programaren barruan antolatutakoa. Erakusketak 1978 eta 2026 urteen artean sari ospetsu hau irabazi zuten argazkiak biltzen ditu, eta hilaren 30era arte egongo da ikusgai.

'Argizaiola Trofeoa'Euskal Herriko Argazkilari Taldeen Elkarteak (EHATE) antolatzen du, 25 argazki-elkarte biltzen dituena, eta Euskadiko argazkigintzaren “lehiaketen lehiaketa" bat da, bertan elkarte federatuek antolatutako lehiaketetan saritutako lanek parte hartzen baitute. Horrela, esan dezakegu Euskal Herriko argazki-aintzatespen gorena dela.

Parte hartzeko gonbidapena ematen duten lehiaketak hauek antolatzen dituzte: Ortzadar Ordizia Elkartea, Argizpi Elkartea, Distira Argazki Elkartea, UK Foto Elkartea, Club Deportivo Eibar, Tolosaldeko Argazkilari Taldea, Zarauzko Argazkizale Elkartea, Ikatza Argazkilari Elkartea, Arizondo Elkartea-Photoka, Artgazki Arrasate eta Agrupación Fotográfica de Navarra -AFI.

Erakusketa honek, trofeo honen ibilbidea eta euskal argazkilarien talentua zaindu, zabaldu eta balioan jartzea helburu duena, lehen aldiz erakusketa berean biltzen ditu “Argizaiola Trofeoa”-ren argazki irabazleak, 1978tik 2026ra bitartekoak.

Erakusketa bost fasetan antolatu da, Euskadiko argazkigintzaren bilakaera teknikoa, estetikoa eta tematikoa islatzen dutenak:

1. 1978–1989: Argizaiolaren jatorria eta begirada dokumentala.
2. 1990–1999: Sendotze artistikoa eta kolorearen hedapena.
3. 2000–2009: Argazkigintza digitalaren etorrera.
4. 2010–2019: Sormen-aniztasuna eta narratiba berriak.
5. 2020–2026: Argazkigintza garaikidea eta egungo erronkak.

Proiektu hau Euskadiko argazkigintzaren historia biziari egindako omenaldia da, eta gure lurraldean argazkigintzan diharduten pertsonen sormena eta talentua ospatzeko gonbidapena ere da.

Expodistrito Bilboko auzoetan

Expodistrito programa aldi baterako erakusketen ziklo deszentralizatu bat da, Bilboko Udalak antolatua. Edizio berri horretan, argazkigintza, pintura, jantzien diseinua, ilustrazio grafiko eta publizitario eta interiorismo  arloetako proposamenak eskaintzen dira udaberrian.

Ekainaren 30era arte, Bilboko auzoetako Udaltegiek ziklo honetako erakusketak hartuko dituzte. Atal berri honetan, San Inazio-Ibarrekolanda, Castaños, Otxarkoaga, Begoña, Santutxu, San Frantzisko, La Bolsa, Abando eta Errekaldeko Udaltegietan Expodistrito elkartearen proposamen artistikoez gozatu ahal izango dira.

Artearen eta sormenaren sektoreari laguntzeko ekimen hori Bilbon sorkuntza eta berrikuntza bultzatzeko estrategiaren zutabeetako bat da, Bilboko Kulturaren 2023-2033 bitarteko Plan Estrategikoan jasotzen dena.