Bilbao basque Fest jaialdiaren azken egunerako programazioa

Bilboko Udalak programazio zabala bezain berezia prestatu du Bilbao basque Fest jaialdiaren azken egunerako. Larunbat honetan izango da, apirilaren 4an, Bilbo euskal identitatearen erakusleiho bihurtu ostean jaialdiak agur esango duenean.

Kirol-arloko mugarria: pentatloi mistoa

Sport blokearen mugarri nagusia 18:30ean izango da Areatzako Kaiko Euskal Kulturaren Plazan, 'I. Bilbao basque FEST Saria' gauzatuko baita han. Pentatloi mistoko lehiaketa ofizial horretan, gizonez eta emakumez osatutako zenbait bikotek erresistentzia fisiko handia eskatzen duen proba konbinatu bat egin beharko dute. Horren aurretik, 13:00etan, emakumezkoen herri kirolen erakustaldi bat egingo da agertoki berean, zeinetan lasto altxatzea eta aizkora proba ikusiko baititugu.

Musika eklektikoa, agur esateko

Larunbateko musika-programazioan gustu guztietarako aukerak izango ditugu:

• 20:00etan (Bilborock): Bisai taldeak kontzertua emango du, rock alternatiboko soinu-lengoaia berrien inguruan egiten duen interpretazio pertsonalarekin.
• 21:00etan (Areatzako Kaiko Euskal Kulturaren Plaza): Anne Etchegoyen iparraldeko artistaren emanaldia izango da. Nazioarteko ahotsik ezagunenetako honek tradizioa eta pop estiloa uztartzen ditu.
• 22:00etan (Kafe Antzokia): Bilbao basque Fest Rock City ekitaldiari amaiera ikusgarria emateko, The Cherry Boppers & Patricia Reckless artisten jazz-funkaz eta The Allnighters taldearen soul bikainaz gozatuko dugu.

Familientzako planak eta azken erromeria

Txikienek aukera izango dute Gargantuaz gozatzen jarraitzeko (11:00etatik 14:00etara eta 17:00etatik 20:00etara) eta jolas tradizionalen tailerrak egiteko Areatzan. Halaber, Itsasadarrean barrena bateletan arraun egiteko azken txandak egingo dira Pio Barojako pantalanetik abiatuta (11:30etik 13:30era). 12:00etan, Hortzmuga Teatroko 'Anfitrioiek' ibilbide antzeztua egingo dute Alde Zaharrean familientzat. Euskal dantzen azken ekitaldia Plaza Barrian izango da 18:30ean, Aiko Taldearen erromeria batekin. Taldearentzat dantza komunikatzeko eta jendartean gozatzeko modu bat da.

Erosketa bereziak eta artea hirian

Larunbata egun paregabea da Market blokeaz gozatzeko. Hala, aukera egongo da Eskutartie Artisautza Azokan zeramikazko, larruzko eta egurrezko pieza ezin hobeak erosi eta Gure Lurreko Merkatuan lurreko produkturik onenak eskuratzeko. Gainera, hiriko museoetan erakusketa bikainak aurkituko ditugu: Arte Ederren Museoko euskal artearen bilduma (Arteta, Chillida, Oteiza) eta Guggenheim Museoko 'Lurraren Arteak' erakusketa, besteak beste.

Zinema: Paul Urkijoren 'Gaua'

BBK Aretoan larunbat eta igande honetan 19:00etatik aurrera 'Gaua' Paul Urkijoren azken proiektua erakutsiko da. Euskara hutsean filmatuta, XVII. mendera garamatzan sinbolismoz eta misterioz beteriko esperientzia bisual eta sentsoriala da. Filmak gaztelaniazko azpitituluak izango ditu.