STEAM proiektuen aldeko apustua indartuko du Bilbok

Bilboko Udalak Zientzia, Teknologia, Ingeniaritza, Artea eta Matematika arloak biltzen dituen STEAM proiektuen aldeko apustua indartuko du. Zehazki, 2026an hiriko hezkuntza-zentroetan bost proiektu berri finantzatuko ditu.

Proiektu horiek larunbat honetan, martxoaren 14an, ospatu den Matematikaren Nazioarteko Egunaren harira aurkeztu dira. Aurtengo leloa ‘Matematikak eta itxaropena’ da. Ekimen hau Bilboko Udaleko Hezkuntza Sailak tokiko ekintzaren bidez hiriko ikasleen artean bokazio zientifiko-teknologikoak sustatzeko egiten duen apustuaren barruan kokatzen da.

STEAM programek helburu dute ikasleek berritzeko gaitasuna garatzea, pentsamendu kritikoa lantzea eta ingeniaritza zein teknologia erabiltzea mundu errealeko arazoei irtenbide sortzaileak emateko. Aldi berean, oinarri matematiko eta zientifiko sendoetan oinarritzen dira.

Matematikak, gizartea eraldatzeko tresna

“Matematika ez da ikasgai hutsa; gizartea eraldatzeko tresna bat da, eta etorkizun bidezkoago eta jasangarriago bat eraikitzeko bidea ere bada”, azpimarratu du Eider Bilbao, Hezkuntza zinegotziak. “Bilbon nahi dugu ikasle guztiek -neskek zein mutilek- jakin-mina piztuko dieten proiektu zientifiko eta teknologikoetara iristeko aukera izatea; izan ere, jakin-min horretan dago UNESCOk aurten aipatzen duen itxaropenaren zati handi bat”, gaineratu du.

Hezkuntza Sailak 2025ean jarri zuen martxan STEAM izaerako hezkuntza-proiektuak babesteko programa bat, eta haren bidez bost ekimen finantzatu zituen hiriko ikastetxeetan. Hautatutako proiektuen artean daude, besteak beste, Berrio-Otxoa ikastetxeko Etorkizuneko Gela; CEIP Cervantes ikastetxeko guraso-elkarteak bultzatutako airearen kalitatea monitorizatzeko eta sentsibilizatzeko programa; La Salle Bilbao ikastetxean sumisio kimikoa detektatzeko kapsula adimendunen garapena; CEIP Pagasarribide ikastetxeko ‘Ortu adimentsua’ proiektua; eta CEIP Viuda de Epalza ikastetxeko guraso-elkarteak antolatutako STEAM Astea.

'Matematikak eta itxaropena'

Matematikaren Nazioarteko Eguna urtero martxoaren 14an ospatzen da, eta UNESCOren Oinarrizko Zientzien Nazioarteko Programak (PIB) eta Nazioarteko Matematika Batasunak koordinatzen dute, nazioarteko eta eskualdeko hainbat erakunderen babesarekin.

2026ko leloa, ‘Matematikak eta itxaropena’, Tales filosofo eta matematikari greziarrari egotzitako esaldi batean oinarritzen da: “Itxaropena da gizakiok dugun ondasunik unibertsalena”. Leloak matematikek zientzian eta teknologian, gizartearen antolaketan eta eguneroko bizitzan duten hizkuntza unibertsalaren izaera azpimarratzen du. Halaber, Nazio Batuen Garapen Jasangarrirako Helburuak lortzeko duten ezinbesteko eginkizuna azpimarratzen du, eta potentzial hori baliatzera gonbidatzen du mundu mailako erronken aurrean ulermena, lankidetza eta baikortasuna sustatzeko.