Bilboko Udalak 751 milioi euroko aurrekontua onartu du 2026rako

Astelehen honetan goizean, abenduaren 29an, Bilboko Udalak osoko bilkura berezia ospatu du, eta bertan hastear dagoen 2026ko ekitaldirako aurrekontua onartu egin du, aurkeztutako alegazio guztiak baztertuz. Guztira 751 milioi euroko aurrekontua izango du Udalak, 2025ean baino 32 milioi euro gehiago. Aurrekontu bateratuak Udalaren mendeko entitate publikoak ere barne hartzen ditu, eta 813 milioikoa da.

Zenbateko horretan, oposizioko talde guztiek azken bi hilabete hauetan egindako eztabaidaren ondorioz aurkeztutako zuzenketak ere (1.171.000 euro) jasotzen dira.  

Aurrekontuaren guztizkoa EAJ/PNVk eta PSE-EEk osatutako gobernu-taldearen aldeko botoekin onartu da, eta, berriz ere, Udalaren historiako aurrekonturik handiena lortu da. Ogasuneko zinegotzi Marta Ajuriak esandakoaren arabera, helburua herritarrek planteatutako eskaerak eta itxaropenak lehenestea izan da, hala nola etxebizitza, segurtasuna, enplegua, zerbitzu publikoen kalitatea eta hiria hobetzen duten hiriko eta etorkizuneko proiektuak.         

Zinegotziak zehaztu du, gainera, gizarte-gastua indartu nahi dela, adineko pertsonei, familiei eta kolektibo kalteberei arreta emateko, “pertsonak gure ekintza guztien erdigunean jarrita beti, eta auzoak hobetzeko ekimen guztiak zuzen-zuzenean aintzat hartuta.   Kontu hauek orainaldiko eta etorkizuneko ikuspegia dute, eta aurrekontu-egonkortasunaren eta finantza-jasangarritasunaren arau fiskalak betetzen dituzte”.

Aurrekontuaren zifrak eta hiri-hondakinen tasa berria

Zifra handi gisa, eta diru-sarreren kapituluan, nabarmentzekoa da, lehenik eta behin, udalkutxa funtsari dagokion zenbatekoa (462 milioi euro), 2025eko 408 milioi euroen aldean. Aurreko ekitaldian 17 milioi euro itzuli baziren, oraingoan 10 milioi euroko aurrelikidazio positiboa dugu.

Era berean, udalaren zerga eta tasei dagozkien 247 milioi euro biltzea aurreikusten da (aurrekontuaren % 33), eta beste diru-sarrera batzuei dagozkien 41 milioi (% 5).    

Ordenantza fiskalei dagokienez, berrikuntza nagusia Hiri Hondakinen Tasa berria izango da, eta horrek orain arte Ur Partzuergoak kudeatzen zuen Zaborraren Tasa ordeztuko du.  2026tik aurrera, Udalak igorriko ditu tasa berri horren ordainagiriak, 2022/7 Legeak agindutakoa betetzeko, eta tasa horrek hondakinen bilketaren, garraioaren eta tratamenduaren benetako kostua barne hartuko du.

Gastuen atalean, kalitatezko oinarrizko zerbitzu publikoetan egindako inbertsioa (argiteria, garbiketa, saneamendua, garraio publikoa, gizarte-zerbitzuak...) 356,8 milioi eurora arte igo da (2025ean baino 19 milioi gehiago), eta udal inbertsio publikoa 132,6 milioi eurora arte (10,3 milioi euroko hazkundea).     

Kopuru horiez gain, udaleko langileei/plantillari dagokiena gehitu behar da: 203 milioi euro, hau da, 6,7 milioi euroko igoera 2025ekoaren aldean.

Aurrekontu berriaren oinarri nagusia zera da, lehenik eta behin, kontu onbideratuak zorroztasunarekin eta zero zorrarekin mantentzea. Honela azaldu du lehentasunezko helburu hori Marta Ajuriak: "funtsezko zerbitzuak ziurtatzea, inbertsio estrategikoei aurre egitea eta herritarren beharrei arintasunez erantzutea ahalbidetzen digu.  Udal kaudimenduna nahi badugu, gure konpromisoak betetzeko gai izan nahi badugu, zorroztasun ekonomikoz jardun behar dugu. Herritarrek, bilbotarrek, guk haiei erantzukizunarekin erantzutea espero dute, eta hori ziurtatzeko, irizpidea, koherentzia, estrategia eta gardentasuna oinarri hartuta kudeatu behar da.”

Hainbat proiektu berri

Datorren ekitaldiko proiektu berrien artean, zinegotziak hauek aipatu ditu segurtasunaren kapituluan: Udaltzaingoa hobetu eta modernizatzeko baliabideak, Santutxun auzo-ikuskaritza berri bat egiteko obrak (1,2 milioi euroko inbertsioa aurreikusten da) eta Deustuko suhiltzaile-etxe berrirako obrak (13,5 milioi euro).

Etxebizitza publikoa eskuratzeko apustuari dagokionez, 2026ko aurrekontuek ia 28 milioi euroko inbertsioak aurreikusten dituzte, 2025ean baino 5 milioi gehiago. Inbertsio horiek Udal Etxebizitzak sozietateak kudeatuko ditu, eta horien erdiak inbertsio publikora bideratuko dira, hau da, 20 milioi euroko inbertsioa egingo da 2026-2027 aldirako. Era berean, Surbisak 5,7 milioi euroko aurrekontua izango du etxebizitzak birgaitzeko, aurten baino % 12 gehiago.

Kulturaren alorrean, Euskal Museoko lanak bukatuko dira, bai eta Arte Ederren Museoko eta Zorrotzaurreko Pabellon 6ko lanak ere. Ekonomiaren eta enpleguaren arloan, baliabideak bideratuko dira berrikuntzako, prestakuntza teknologikoko, ekintzailetza bultzatzeko eta lehiakortasuna hobetzeko programetara, hiriko sektore guztiei mesede egingo dien sare ekonomiko sendoa, dibertsifikatua eta erresilientea sortzeko. Aberastasuna sortzen eta Bilbo kanpoan sustatzen lagunduko duten ekitaldiei dagokienez, datorren maiatzeko Errugbiko finalak prestatzen ari gara.

Zerbitzu publikoak hobetzeari dagokionez, Bilbo irisgarriago bat egiten jarraituko dugu, elementu mekaniko berriekin (5 milioi euro gehiago); egoiliarren aparkalekuak elektrifikatuko dira, eta bizikleta-sarea konektatzeko eta hobetzeko obrak egingo dira. Halaber, saneamendu-sarea eta ur-hornidura berrituko dira, 8,5 M eurorekin 2027ra arte. Badaude beste proiektu garrantzitsu batzuk ere, hala nola Olabeagako hiri-berroneratzea (18 M €) edo Zorrotzako trenbide-integrazioa (24 M €).

Arlo sozialean, zinegotziak gogorarazi du Bilbok erronka eta eraldaketa garrantzitsuei egin behar diela aurre, hala nola bilakaera demografikoari, biztanleriaren zahartzeari, berdintasun ezaren murrizketari, gizarte-kohesioari eusteari, migratzaileen gizarteratzeari, adingabeen babesgabetasunari edo indarkeria matxistari, besteak beste. Bide horretan Gizarte Ekintza Saila, Osasun eta Kontsumo Saila, Gazteria Saila, Berdintasun Saila eta Lankidetza Saila daude inplikatuta (90 milioi euro inguruko aurrekontua dute guztira).